Don ka jingthmu ban pyniap khnang ia U Bah Cherish?

Hadien ka kaiphod jong u nongbishar T Vaiphei, ki la mih shibun ki jingkylli, halor ka jingshah pyniap U Bah Cherish Thangkhiew bad kata ka long, ba ka kaiphod hi, ka pynrem jur ia ka jingleh kput jong ki pulit, ia U Bah Cherish, haduh ba un da duh ei, ia la ka jong ka jingim bad ka dei ruh halor katei ka kaiphod, ba ka wan ka wan ka mat iakren, la ki pulit, ki leit ban pyniap khnang ia U bah Cherish bad lada ka dei kumta, khlem pep, ka dei ban don ka daw kaba sha lyndet.

Kane ka mat, ka shon bha, ha uba bun balang, namar ba ha kat katei ka jingdum jong ka miet, ha ka por 3baje mynstep, ki pulit, ki leit khlem torchlight sha ka iing jong utei uba iap bad kam dei tang kata, ki khlem rah ruh ia ka ambulance, kaba dei sa kawei pat ka mat, kaba pyn artatien shibun.

Namar ba ka mat, kan khuid kdar, ka la dei namarkata, ba kan don da ka kynhun tohkit, kaba laitluid bad katei kan sdang ia ka jingtohkit, naduh ka por, ba utei u nongialam ka HNLC, u wan phai sha la ka Ri ha u snem 2018 bad ka jingtohkit ruh, ka dei ban shai, la u wan ban shongthait noh ialade, lane ban iarap ia ka sorkar, ban iakren iasuk bad ki dkhot jongu, kiba don ha Bangladesh, ne ioh ki don sa kiwei pat ki jing iakut bad lada ka don ka kynhun tohkit kaba khlain bor, kan lah ban lap, lada ka don ka jingiateh kaba ha u snem 2018.
U Bah Thangkhiew, u ioh lad ban shongthait ha la iing, tang 3 snem eiei, hadien ba ula wan phai na Bangladesh bad hangta ruh, ka jingtohkit, ka dei ban shai bha, la u ju trei aiu ha kine ki snem ba ladep bad la u dang don ne em, ka jing ia leit ia wan bad ki pulit lane lehse bad ki dkhot jong ka HNLC, kumba don ka jingkynnoh, ha katei ka kaiphod kaba dang shu pynmih paidbah.

Kumba la iakren, da baroh, ba ka kaiphod hi, ka ai tang ia ka jinglap jongka; hynrei kam don bor ban tian bishar lane ban rai pynrem iano iano bad haba ka long kumta, ka kam, ka nang jyrwit bad nang suhsat kai bad kumta ka donkam, ka jingtohkit, kaba don bor ruh ban tian bishar lane ban pynshitom ia kiba don bynta ha katei ka kam pyniap briew bad ban leh ia kata, ka dei tang ka CBI, kaba don ia ka bor ban kem, ban rai phatok ia ki riew bymman.