Shillong:Ka seng HITO sa shisien pat ka la lap sa ïa ki lai tylli ki trok kit dewïong beaiñ ha petrol pump kaba don hapdeng ka Shnong Mukhla bad Khliehtyrshi, kaba dang hab hapoh ka West Jaiñtia Hills District.
Ka seng HITO Jowai ryngkat bad seng kaba ha ka Thadlaskeiñ area hapoh ka jingïalam u In charge Thadlaskeiñ area u ma Solomon Rymbai bad u General Secretary HITO Jowai u Izameyoo Susngi, ki la leh ïa ka jingjurip kaba kyndit kynsan bad ki la lap ïa ki 3 tylli ki trok kit dewïong beaiñ bad ïa kitei ki trok la ujor Ejahar bad aiti noh ha Ummulong Police Beat House ban leh ïa kaba donkam katkum ka aiñ.
Ka seng kan ïai bteng ban bat khynra ha man la ki jaka ba ïaid ki trok kit dewïong kum ka dak ban pynibor ïa ka jyrsieh bamsap jong ka sorkar MDA.
Ka sorkar ka pynslem khnang ïa ka aiñ ban tih bad ban shalan dewïong namarba ba da khaïi be-aiñ ym donkam siew khajna.
Ka seng ka kynnoh ruh ba jingïoh pisa ki katto katne ki political party ban tei party office, ka dei na ka pisa bai entry kita ki high level.
Ka seng ka kyntu ïa ki trai dewïong bad trai trok ba kim dei ban ïaleh pyrshah bad ka seng namar ka jingïakhun jong ka HITO kadei bad ka sorkar MDA ban pyllait ïa ka jylla na ka bamsap ne corruption.
Ka jingkylli ka long ba kumno kat ia ki nongkhaii droks kiba kit tang da ki grams lah ban kem suk ia ki, hynrei ia kat ki trok kiba kit dewiong da ki ton ym lah satia ban bat ne kem na surok bah haba ki iaid.