Nyngkong ym plie Casino, mynta pat rai ban ïaid shaphrang, ong ka HYC

Shillong:Ha ka 28 tarik u Nailar, 2022 u Symbud Myntri Rangbah ka Jylla u Bah Prestone, u la kren da kaba shai lyngba ki lad pathai khubor ba “Ka Sorkar MDA hapoh ka jingïalam jong ka NPP ka la rai ba da lei lei ruh yn nym shah plie Casino ha Meghalaya hadien ba lah mih ki jingpyrshah ba jur na kiba bun ki Seng, Ki Dorbar Shnong, Raid, Hima, ki Nongïalam niam bapher bapher bad wat ki paidbah hi ruh”. Ha kine ki khyndiat sngi u Myntri Rangbah ha ka jingïakynduh bad ki Nongïalam Shnong na thaiñ Ri Bhoi, u la pynthikna bad kular ba ka Sorkar kan nym ïaid shakhmat ban buh ïa ki jaka ïa khalai ne Casino ha kano kano ka Distrik lada don ka jingpyrshah na ki paidbah.

“Hynrei kitei ki jingkren bad jingkular ki kylla long kamkai lut hadien ba lah paw tyngkreiñ ba watla bun kiba pyrshah ruh ka Sorkar kam kheiñ snep bad suitñiew satia ïa ka sur u ba bun ba lang bad ka lah iaid shakhmat ban ai jingbit ïa ki 3 ngut ki briew na ka bynta ban buh ïa kine ki jaka ïakhalai ha ka Jylla jong ngi,” ong ka HYC.

Kane ka lah paw lyngba ka jubab u Myntri ka Taxation Department u James Sangma hapoh ka Ïing Dorbar Thaw Aiñ ka Jylla ha ka Sngi nyngkong. Kane ka jingleh jong ka Sorkar hapoh ka jingïalam jong ka NPP, khamtam ki Department kiba bat da ka NPP, ki kheiñ dewthala lut ïa ka jingsngew u paid nongshong shnong ka Jylla la kadei ki Balang ne ki Dorbar Trai Ri ruh. Wei ba ki lah rai ban ïaid shakhmat ïa kano kano ka kam na ka bynta ka myntoi jongno re jongno, kam sngewdei shuh ban sngap ïano ïano ruh, bynrap ka HYC.

Ka Seng ka sngew ban pynpaw ba ka pyrshah jur ïa kane ka rai jong ka Sorkar ban ai jingbit plie ïa ki jaka ïa khalai ne Casino ha ka Jylla. “Ngi sngew ba kine ki jaka khalai kin wanrah jingeh bad kan ktah ïa kiba bun ki Nongshong shnong khamtam ïa ki khun samla kynthei bad shynrang bad ïa ki longïing longsem hi baroh khlem da thew la ki dei na kano kano ka niam ne ka kynhun jaitbynriew,” ong ka Seng.
“Hooid lehse kane ka rai jong ka Sorkar kan wanrah jingmyntoi lyngba ka khajna ka ban sa ïoh lum hynrei hato tang na bynta ka khajna, ngi long kiba lah kloi ban ïa peiñ ïa ka lawei ki khun samla bad ka lawei jong ki nongshong shnong ka Jylla hi baroh kawei. Hato ngi lah kloi bad hun mynsiem ban pdiang ïa ki jyrsieh ki ban mih bad ktah ïa ka imlang sahlang lyngba kine ki kam khalai?,” kylli ka HYC.

“Ka Seng ka khot ka wer ïa ka Sorkar, ïa ki MLA/MDC bad ïa ki ophisar Sorkar baroh ba kin sngewbha ban da puson bad pyrkhat bha halor kane ka kam bad shim rai da ka jingkitkhlieh ba hato ki jaka ïa khalai kin ktah kumno ïa ngi kum ka Jylla? Kaba kumno ka lawei ngi kwah na ka bynta ki khun samla bad ki Nongshong shnong ka Jylla? Hato kita ki jaka ïa khalai kin wanrah ka jingbha ne pynroi ïa ki kam sniew? Ne ngi shu kmen tohhoh tang namar ba ngi ïoh lum khajna shibun shibun na ki? Ka Seng ka dawa ba ka Sorkar ka dei ban sngap ïa ka rai jong uba bun ba lang ha shwa ban pyntreikam ïa kane ka Aiñ bad kadei ban pynsangeh shwa ïa kita ki 3 tylli ki laisen ba lah ai,” ong ka kyrwoh na u Bah Rhembor G. Saibon, Vice President, HYC CEC.