Ka PWD, ka shu pynbiej paidbah ia ka surok Upper Shillong?

Ka jingkren U bah HM Shangpliang, MLA jong ka Maw synram, halor ka jingdheng kali, ka long kaba pynkthang mynsiem shi katdei, namar ba utei u dkhot, ula kren ia ka jingeh, kaba u paidlang ka Ri Khasi, u iakynduh ha kine ki sngi.

U Bah Shangpliang, ula ai syndon tlain, halor ka jing bym lerkam ka sorkar bad kawei, ka long halor ka jing ailad ia ki trok kiba kitkhia ba kin iaid baroh shisngi ha ka nongbah Shillong bad nangta, ula nion tyngeh, ia ka jingsniew ka surok sha ka thain Upper Shillong, kaba dap da ki thliew ki syar suda shilynter.
Kaba ula sei madan, utei U MLA, ka dei halor ka jing pynbiej paidbah jong ka tnat PWD, namar ba ka shu khot ia ka kompeni shna surok; hynrei tang ka jaka ruh kam pat pynbiang eiei ruh em bad katei ka dei ka kam biej tasam, kaba la sngew lehrain, tang ban iakren briew ruh.

Ym tang katta, katba kum ka jingkren U MLA, ka nang shai shuh shuh, ba ym tang ba ka kompeni, kaba trei ia ka surok, ka la leit phai noh; hynrei, ka la kit lang bad ka tyngka hi buk, kumba lah dep ia kut dor lypa, naduh ha shwa ban sdang ia ka kam bad katei ruh kam dei satia, ka pisa jong ka sorkar jylla ne jong u myntri PWD, hynrei, ka dei ka umsyep ba u rit u ria u trei shitom, katba ka sorkar ka shu leit bret kai shapoh nala.
Na katei ka jingkren U MLA, ka paw shai, ba ka surok sha Upper Shillong, kan nang buh jingeh, ha kine ki sngi, ban sa wan, namar ba ka PWD, ka la aiti sha ka sorkar India lane sha ka NHIDCL, katba ia ka jingtrei, yn nym lah ban pyniaid satia, namar ba ia ka bhah ba la mang da ka sorkar India, la shu ioh kit ei u kontraktor bad kumta, kan donkam ban ai pisa shuh sha ka jylla, lada ka dei ban bteng ia ka jingtrei surok bad lada ka long kumta, katei ka surok, kan nang jubor ka jingsniew tasam, nangta kan nang shimpor, ban trei thymmai bad kaba lah ban poi da ki phew snem.

Donbok, ba kan nym jia kumta, hynrei, lada ka la sniew lypa na khlieh lane na Upper Shillong, kumta kaba bteng sha kjat lei te, kaba long ter lyter na Mylliem sha Pynursla bad sha Dawki, sa tang ban shu ia peit jawdud ia ka mariang, kaba la shuh pynjulor thiaw, khlem don daw eiei ruh.