Ka New Shillong, ka Shillong ki ophis sorkar

Ka jingthmu jong ka sorkar jylla, ban buh ia ka New Shillong, ka long ban pynkylluid ia ka nongbah Shillong kaba mynta, namar ba ka la khapngiah palat.

Hynrei katei ka jingthmu, ka la kylla da khongpong ha kine ki sngi, ha kaba leit ka wan, ka la nang sohsat ha ka Shillong barim, katba ki ophis heh jong ka sorkar India, ki nang tei wut shi wut ha kata ka Shillong thymmai, kaba ngi dei ban tip noh, kum ka Shillong ki ophis sorkar India.

Khyndiat sngi mynshwa, la iohi, ba ka sorkar jylla, ka la ai kylluid mynsiem, sa shiphew acre ka jaka sha ki shipai CRP bad ka jingkylli hangne, ka long ba balei ka donkam ban ai ei ia katei ka jaka sha kitei ki shipai, haba ki la don ia ka ktem kaba heh duh jongki ha Byrnihat bad kaba pyn pyrkhat, ka long shuh, ba katei ka thain, ka ju iakynduh jingeh bad ki shipai hi ha Mawshbuit, hynrei, tang ia katei ruh, ym pat lah ia beit; mynta, ki la nang pynieng shuh sa kawei ka pyrton shipai.

Naduh ba ka sorkar jylla, ka la sdang ban kurup da ka bor ia ka New Shillong, (ha kaba ka la pynher krad ia kiba bun bah ki trai jaka, kiba ialeh pyrshah); ki la don da ki phew tylli ki ophis ba heh jong ka sorkar India, kiba la ioh ban tei ia ki dulan bah jongki, ha katei ka jaka bad katei ka la pynduh noh ia ka jingmut ban pyn kylluid ia ka Shillong barim.

Kine ki ophis sorkar India, haba ki wan, ki ioh ia ka jaka kaba heh tasam bad nangta sa ki nongtrei jongki, ki ioh ia ki jaka sah kiba biang; hynrei ha kawei pat ka liang, kito ki para ri jongngi, kiba shong marjan, ki shong ha ki iing wai, ki shong ha ki iing tap shiliang bad kim don ka jaka lajong bad katei ka dei ka nusip jot ia ki trai jaka, kiba la shah lied jubor ki iing ki sem jongki, ha ka tnat pynroi sor, ha ki khyndiat snem mynshwa.
Namar ba ka Shillong thymmai, ka la pheil, ia ka jingmut jongka bad kane ka dei pynban, tang ka jing ia sylla ban ai jaka ia ki ophis sorkar India, ka la dei namarkata ia ka tnat pynroi sor, ba kan pynphai noh ia kitei ki jaka sha ki riew paidbah, da kaba ai jaka, ba kin shong iing shong sem.
Kaba sngewsih, ka long ba kiba bun ki para ri jongngi, ki la bun kiba shongwai bad kim don shuh ia la u tnum u tyndai bad ka sorkar jylla, ka la dei ban ai da ka skhim ai jaka, namar ba ka sorkar India, ka la ai da ka skhim ai iing.