U Rangbah Khasi

U long u kñi ha la iing kur,
Ha iing lok pat kum masi lur;
Nongsneng nongkraw ia ki pyrsa,
Ia ki khun pat u nongai ja.

Nongsynshar jong ka kur u long,
Kam kur u kit nadong shadong;
Bor ka shong ha u kum u kñi,
Uta dei u Rangbah Khasi.

Ha ka dustur jong u Khasi,
La ñiew burom eh ia u kñi;
Ha jingiapoi kha lei ki ong,
Khlem don ma u kam lah ban long.

Kur kynthei dei tang nongsumar,
Khyndew ka shyiap spah ka hajar;
Kam lah lyndet n’u rangbah kur,
Ban die duh khlem ka jingmynjur.

Rangbah Khasi ba lah ba iai,
U kit u bah ha dum ne shai;
La ha iing lok u long nongwei,
Ia kata um ju sngew ei ei.

Hynrei pat ha kine ki por,
La nang sloit noh ia ka lyngkor;
Ha iing kur um lah ban tuklar,
U kur ki briew u la synshar.

Ka jingiajan bad ki pyrsa,
Kam long shuh kum por mynshuwa;
Ban sneng ban kraw ym don por shuh,
Pyrsa i’u kñi shadien ki buh.

Donkam ba ngin pynneh pynsah,
Riti dustur barim bajah;
Lehse ka jaitbynriew kan shngaiñ,
Lada ka bor u kñi ka khlaiñ.

La thoh da i Mr Hopestarwell Snaitang, Seiñduli II, WKHD.