Sei met iap khynnah 15tylli na duriaw bah, poi 35ngut kiba iap Phet shnong da ki lak ngut ha Bangladesh, na ka eriong Mahasen

Dhaka, 16 Jymmang:
Mynta ka sngi ki nong pahara jong ka rud duriaw Bay of Bengal, kaba hap ha Bangladesh, ki la ioh sei ia ki 22tylli ki met iap, kiba per ha katei ka duriaw bah bad la iathuh ba kitei ki kynthup ia 15 ki met jong ki khyllung, lai ki met jong ki kynthei bad saw ki met iap jong ki shynrang, ong ka khubor kaba la ioh lum na Dhaka. Katei ka dei na ka daw jong ka jingkhie jubor ka eriong Mahasen, kaba la jia ha ki bynta ba shatei jong ka Bangladesh.
La iathuh shuh shuh, ba ki dang don sa shibun ki met iap, kiba dang per halor um, haduh ba thoh ia kane ka khubor.
Ki pulit jong ka Teknaf Police Station, ki iathuh ba ka don kawei ka lieng, kaba la shah rong ha ka um ha ka sngi ba lang ba ladep, tangba ym shym la tip la ki don katno ngut ki briew ha katei ka lieng bad katei ka lieng, ka la shah rong beit beit sha ka duriaw bah jong ka Bay of Bengal. La iathuh ba kitei ki dei ki briew, kiba mut ban leit phai sha Malaysia.
Kiwei ki lad khubor, ki iathuh ba ha katei ka lieng, ki don 200ngut ki jait bynriew Rohingyas, kiba la mih na Myanmar ban leit sha Malaysia bad ka don ka jingantad, ba lehse kitei ki 22tylli ki met iap, ki dei kiba na Myanmar. Kiwei ki lad khubor, ki iathuh ba kumba 100 ngut ki briew ki la mynsaw jur bad da ki hajar ngut ki la shah ktah ha kylleng ki jaka jong ka district ka Pataukhalj ha ka jinglynshop jong ka Mahasen . Kane ka jingjia ka la jia ha ka por 7:00 haduh 10:00 mynstep ha Rangabali la iathuh u heh ophisar ka Upazila nirbahi u Md Liakat Ali.
U Shanti Ranjan Bouddha, district relief and rehabilitation ophisar u la iathuh ba kumba 70,419 ngut ki briew ki la shah ktah ha kane ka jingija bad , 7,540 tylli ki ing ki la julor ha kaba 18,238 na ki ki la jot la pra hi phum ha ka jingkhyrwit tyngeh ka Mahasen hynne ka sngi.
Ki heh ophisar ki la iathuh ba ha ka por ba katei ka jingjia ka la jia kumba 109,332 ngut ki briew ki la mareh ban leit rieh ha ki 298 tylli ki jaka rieh kiba don ha ka District.T. 992,500 lak ha ka pisa Bangladesh bad 190 metric tonnes u khaw la sam sha baroh ki briew kiba la shah ktah ha kane ka jingjia la ong u Ranjan Ki bor bahalor ki la lah ban sam bording ha ka sor pataukhalj ha ka por janmiet hynrei kane ka jingsam bording ka la shu dkut noh ha ka miet sngi balang.Ha katei ka jingjia kaba sngewtriem kumba 50,000 hectares ka khyndew ba la dep ban thung jingthung ka la julor. Baroh ki surok ha katei ka jaka kiba pyniasoh na kawe ka jaka sha kawei pat kam long iaid shuh namar ka jingdap palat ka um.
Kiwei pat ki khubor, ki iathuh ba sa 14ngut ki briew, ki la iap mynta ka sngi, ha ki bynta jong ka Barguna, Bhola, Patuakhali bad Pirojpur, haba ka eriong Mahasen, ka la lynshop jur ha ki rud duriaw jong ka Bangladesh. Katei ka jingjia, ka dei ha ki bynta ba shatei jong ka Bangladesh.