HA KA KUTLAD

P.B.S

[ba bteng] “Ka dei ka dei pa pa. Ym sngewkwah ban kut tang hangta hynrei dei ban don hi u krajwed ne tam ruh” kynrup ktien u Halbert ba u sngewiahap ia ka jingong u kpa.
“To ieh kata baroh ka shong ha u Nongkyrkhu uba na jrong. Lada u ibit ba ngin nang kiew shuh un nang plie ka lad ka lynti ba ngin ia ryngkat briew” ong ka kmie bad ka ieng ban mih shabar
“Kata ruh ka dei kein kmie” mynjur u menkpa.

“Freda wanrah kato ka shangkwai hangne ha baranda. Phi ki kynthei sa nang khreh noh ka shet ka tiew, ka lum ka lang ia ka iing bad sa sait ka khlieng” ong bad kyntu kam ka kmie
“Tip nga bakla ne kumno nga iohi ia u Hiram ba u don shane” ong u menkpa bad ka tan sikret
“Ioh u wan shuti kein” ong ka menkmie bad ka ai kwai ia u menkpa
“Mynta ba nga la bunkam ha la ka kam bad ba ngim ia leit skul lang shuh bad sa kawei ruh ka jingniewpoh eh ki kmie ki kpa jong u ngam da kynmaw than shuh ia u ym kum mynshuwa” ong u Halbert bad u kner ia u kwai ba ai ka kmie
“Ynnai ynnai iajan khun bad ki khun riewspah ki briew. klet noh ia kiei kiei hynrei nang iai pynleit jingmut ia la ka kam ba phin nang kiew shuh shuh. Da ia tyngkhuh eh markhmat te u kren hi hynrei ban ong ban leh sboh te ym sngewtynnad” pynpaw ka kong Larisa.

“Nga sngewdei ia ka jingong jong phi mei. Ngin shu sien hynrei ym dei ban da pynpaw eh namar ha ka jinglong briew jong ngi ym lah tip” ong u khun
“Balei kane ka pyrthei ka briew katne katne dei namar ba don lut ha ka. Tang shi rong te ym don dur ym don dar. Tang kawei kaba donkam eh ha ngi ka long ka jingsngewrit, ka jingiaishah, ka jingshaniah ha lade bad ka jingngeit kaba skhem” ong u menkpa
“Ha ka jinglong briew jong ngi pat kpa kiei kiei baroh ki don da u pud. Ban shu kren bein, ban ibein ym da dei eh. Nga shu hun bad nga ngeit ba u Blei u tip lut bad iohi lut bad ka bainong ka ap katkum ka jingleh jong ngi” kren khia thew ka menkmie.

“To mei pa la biang. La dei ka por ban leit la ki kam ki kam. Ha ka jinglong shi tylli bad ka jingiaieid ym don jingeh ei ei ruh em” ong u khun bad u ieng ban khreh ialade ban leit noh sha la dukan
Ba ka dei ka sngi saitjain ki hap leit beh kloi sha la ki kam ban nym ktah ka die ka pet bad ki nongwan donkam ha ka dukan mobai u Halbert. Katba u Halbert u dang iaid lynti ban leit sha la ka dukan lah bun ki kostomar kiba phun ia u. U la slem shiteng kynta kumba ju dei ka rukom
Haba la dei ka por dihsha sngi, u Halbert kumba ju leh u phah wanrah beit na dukan katba u dang dihsha marwei la wan mih uwei u kostomar jong u uba wan shim ia la ka mobai ba u phah shna. Da ka mynsiem ka jingsbun u Halbert u shu phun ban wanrah sha biang sa kawei. Katba ki dang dihsha uta u briew u la ong
“Bah phi i bunkam bha”
“Hooid, nga bun hi” jubab u Halbert
“Ynda phi donkam briew sa ong ia nga mo namar nga don uwei u khun ba la leit training ia kane ka kam” ong uta u rangbah briew u bym duna ia ka 50 snem tam.

“Ka long kumne phi bah katba nga dang lah hi ban trei nga trei hi beit. Lada ka por ka batai nga hap wad nongtrei hi ban kham suk” ong u Halbert bad u shim biang ban bam ia ka ja shawlia
“Em, nga ruh nga shu pynong namar nga la sngew paralok bha bad phi” ong u rangbah bad u buh ia ka pela dihsha kham ha kyndong
“Ka kam lajong te kaba eh shisha phi namar hap trei shitom tang shuh pep ruh lah duhnong. Sa kawei ruh hap ban nang ban pyniadei bad ki nongaikam. Ki tang shu thut lah ktah ia ka kam. Ka dawa lut ia kiei kiei kum ka akor ka burom, ka ktien ka thylliej, ka jingbiang bor bad ka jingpyndep hok katkum ka jingiakut” ong u Halbert bad u buh lang hajuh ia ka pela [yn dang bteng]