Mih ka jhad na Kolkata sha Tamabil, ban wad lynti ia khaii da ka lynti um sha Bangladesh

Kolkata: Ka MV Trans Samudera, ka jhad kit mar, ka la mih hynnin ka sngi, na ka kad jong ka Kolkata ban iaid wad lynti, ban shalan mar, da ka lynti um hapdeng ka India bad ka Bangladesh.

Katei ka jhad rit, ka kit 25 ton, u nar rod jong ka Tata Steel bad katei ka jhad, kan iaid lyngba ka thain shatei lam mihngi ban pyniasoh ia ka kad khaii hapdeng ka India bad ka Bangladesh.

Ia kitei ki nar rod, yn pynhap ha ka kad ha Chittagong bad nangtei, katei ka jhad, kan kit ia u slasha, ha kaba kan iaid lyngba ka kad khaii ha Dawki bad Tamabil bad kan leit phai biang sha Kolkata.

Ha U Lber mynta u snem, ka Joint Group of Customs (JGC), ka la rai ban iaid pyrshang, na ka bynta saw sien kynthih, ha kaba yn pyndep ia katei ka jingiaid pyrshang ha ki 6 bnai ban sa wan bad katei ka jingthmu, ka long ban wad ia ka lynti iaid kaba thymmai, hapdeng ka Tamabil bad ka Chittagong.

Ka Tamabil, ka hap ha Sylhet jong ka Bangladesh bad ka don ha khappud bad ka Meghalaya, katba ka Sheola, ka don 25 Kilometre ha Karimganj jong ka Assam. Katei ka jingthmu, ka long ban kit ia ki mar ki mata, kiba pynmih na ka thain shatei lam mihngi sha Kolkata lane sha Haldia, da kaba iaid da katei ka lynti um.