Bthah ka AICC, ban thaw da ka EC Congress ha KHADC

Shillong, 16 Jymmang:
Namar ba ka elekshon MDC, ka la hajan eh, kumta la sngewthuh ba ki heh Congress na Delhi, ki la hukum ia ki nongialam jong ka seng ha ka Jylla, ban pynkylla noh ia ka jingsynshar ha Khasi District Council bad ban pynlong beit da ka jingsynshar shi seng, ka ban long beit ha ka lama jong ka seng Congress (I).
Katei ka jingiakren, la sngewthuh ba ka mih,ha ka jingleit jong U Bah DD Lapang, President Meghalaya Pradesh Congress Committee (I), ha kaba u iakynduh ia ki heh Congress ha Delhi, ba kynthup ia ka Sonia Gandhi bad kumjuh ia u Rahul Gandhi Vice President jong ka seng.
Kumba ka long mynta ha KHADC, la thaw da ka kynhun synrop, kaba la ai kyrteng Khasi Hills United Democratic Alliance (KHUDA), hynrei ha katei ka jingpynbeit kaba thymmai, U bah PN Syiem, Chief Executive Member, un hap ban weng noh ia ki dkhot jong ka seng UDP, HSPDP bad ki dkhot shimet, kiba don mynta ha ka Executive Committee bad kitei ki kynthup ia U bah Teinwell Dkhar, uba mihkhmat na Shella Constituency, U bah LG Nongsiej, uba mih khmat na Nongstoin, Kong Grace Mary Kharpuri MDC shimet na Nongshken Constituency, Bah Oris Pamshong, ba mihkhmat na Mawhati bad uba kyrshan ia U bah Julius Dorphang, U MLA shimet nalor kiwei kiwei pat.