Mynjur ka sorkar, ban kyntiew tulop ia ki nongshet ja sngi

Shillong:U Director ka tnad pule puthi ha ka jylla u Ambrose M Marak u la iathuh ba kan long kaba shitom ia ka tnad ban pynbiang ia ki LPG gas, na ka bynta ki 11,800 tylli ki skul ba kin shet bam na ka bynta ki khynnah skul.

Haba ia kren bad ki lad pathai khubor u Marak u la ong, halor ka jingdawa jong ki ban pynbiang da ki LPG gas na ka bynta ban shet bam ia ki khynnah skul ka long kaba eh, hynrei ka tnad ka la shim khia ban ia kren bad ki Deputy commissioner, halor kane ka bynta.

U la bynrap “Ngi la ia kren bad ki Deputy commissioner hynrei kan shong ha ka jingdon ki LPG gas, namar ba kan ym long kum ki jingpyndonkam domestic, hynrei kin long kum ba pyndonkam commercial bad ban pynbiang LPG gas ia ki 11,800 tylli ki skul kan shem jingeh”.
U la iathuh ba mynta ka sngi na ka liang u Education commissioner bad ryngkat bad u, ki la dep ban ia kynduh ia ki nongialam jong ka Seng nongshet ja sngi ia ki khynnah skul ban ia kren halor ki jingdawa jong ki.

“Ha ka jingialang ngi la pynshai ba ka jingdawa ban pynbiang LPG ia ki 11,800 tylli ki skul kan Shem jingeh bad ka tnad kan dang don kam ban bishar halor kine ki mat”u la ong.
“Halor ka jingdawa ba ka sorkar ka dei ban ai tulop na bynta ki bnai ba don shuti ki skul, na ka liang ka tnad ka la iathuh ia ki ba kin dang donkam ban bishar halor ka jinglut jingsep na ka bynta ban ai tulop na bynta u bnai Naiwieng bad Nohprah”u la bynrap.

U la ong “Halor ka jingdawa ban pynkiew ia ka tulop u Marak u la iathuh ba na ka liang ka tnad ka la dep ban phah ha ka jingtyrwa sha ka tnad Planning and Finance ban pynkiew ia ka tulop ki nongshet jingshet na ka T.1000 sha ka T.3000 shibnai”.
“Ka tnad Planning and Finance kan hap ban bishar ia kane ka jingtyrwa ba la phah da ka tnad pule puthi, namar ba ka jinglut kan kot sha ka T.20 klur tam ha ka shisnem bad T.18 lak shi bnai na ka bynta ki 11,800 tylli ki skul”u la bynrap.

Lah ban kdew hangne ba na ka liang ki nongshet ka sngi ia ki khynnah skul, na ki skul ba pher ba pher ki la pynlong ia ka jingiakhih jong ki ban pynurlong ia ki jingdawa jong ki, ka ba kynthup ia ka jingpynkiew tulop, ka jingsiew ia ka tulop ha ki bnai ba don shuti ki skul bad ban pynbiang da ki LPG gas ha ki skul.