Pynkup burom ka RBC ia 325 ngut ki samla kiba la pyndep ia ka jingpule na Kolej

Nongpoh: Ki la don haduh 325 ngut ki samla kiba la pyndep ia ka Sixth Semester lane ka Graduation ha ka Arts bad Commerce ha Ri Bhoi College, mynhynnin ka sngi, ki la shah pynkup burom ha ki nongpyniaid jong katei ka Kolej.

Haba pynkup burom ia kitei ki samla pule, la sakhi da ka jingdon u Bah Mayraldborn Syiem, MLA Nongpoh, kum u kongsan, ha ryngkat ka jingdon u Bah SSR Bamon Principal ka Ri Bhoi College lem bad ki ki Proffesor jong katei ka college. Haba ai jingkren ha katei ka sngi, u Bah Mayraldborn Syiem, u la kren halor ka jingdonkam ka jylla ban don noh la ka jong ka University hapoh ka jylla, khnang ba kan da long shisha ka jingmyntoi, na bynta kito ki samla, kiba kwah ban bteng ia ki jingpule kiba kham shalor.

U la ong ruh ba ka jylla, kam dei ban shu shanniah tang ha ka skulbah North Eastern Hill University (NEHU). Kumta haba iadei bad katei ka jingangnud ba ka jylla kan don noh la ka jong, u MLA Nongpoh, u la ong ba ka long kaba donkam ka jingiatreilang jong baroh, naduh uba heh naduh uba rit, khnang ba katei University kan urlong hapoh ka jylla.