Thung ka DC ïa 11 kynhun ban weng, ia kiba shong dukan madan

Shillong:Ka Deputy Commissioner ka East Khasi Hills Kong Isawanda Laloo, ha ka sngi palei, ka la thung haduh 11 tylli ki kynhun ban pyn treikam ïa ka hukum ban weng ïa ki nong shong dukan madan na ki lynti ïaid kiba pynkhapngiah ïa ka leit ka wan jong u paidbah.

Kine ki Kyn hun ki dei kiba la khlieh da u Magistrate bad ki kynthup naduh ki Pulit, ki briew na ka Tnat Urban Affairs, ka Shillong Municipal Board, PWD, PHE bad kiwei kiwei ki tnat.
Kine ki kyn hun kin leit ban jurip ïa baroh ki jaka ba don ki nongshong dukan madan ha kylleng ka Nongbah Shillong kynthup naduh ka Motphran, Police Bazaar, Polo, Civil Hospital, IGP Point, Barik, Laitumkhrah, Laban, Rynjah, Nongmensong bad Madanrting.

Katkum ka hukum jong kane ka Khliehduh ka District, la ong ba ki Magistrate ba khmih ïa kine ki kynhun ki dei ban leit jurip ha la ki jong ki jaka ba la buh bad ban aiti ïa ka kaiphod hapoh ka 30 tarik u Nailar.
La bthah ïa kine ki kynhun ba kin ithuh ïa ki jaka ba khapngiah kaba dei na ka daw ka jingdon ki nong shong dukan madan bad nongdie madan.
La aibor ruh ïa ki kynhun ba kin buh kyndon bad pynbeit ïa ka jingsatah ki rukom shong dukan madan kat kaba lah, kum ka jingpynduna ïa ki dukan, pynthikna ïa ka jingïajngai hapdeng ki dukan madan bad kiwei, ha kata ka rukom ban pynthikna ba ki nongïaid nongïeng kin ïoh jaka ban ïaid bad ba ym dei ruh ban ïapeiñ ïa ka jingshngaiñ bad ka jingkylluid ki surok ban ïaid ki kali.

La bthah ruh ba ki kynhun kin lum ïa ki jingtip shaphang ki nongshong dukan madan ha kane ka jingleit jurip bad bthah ïa u CEO ka SMB bad District Urban Planner ba kin ïarap lang ha kane ka kam.
Nalor kane, la aibor ruh ba kin ithuh ïa kiwei ki jaka lada jia ba kim lah ban pynbeit ïa ka jingsatah bad ban pynkynriah ïa ki nongshong dukan madan.
Ka Deputy Commissioner ka la bthah ruh ba ki Kynhun ki dei ban ïatreilang bad kiwei pat ki kynhun ba ïadon bynta ha ka kam kum u Syiem ka Hima Mylliem, ki Rangbah Shnong haba donkam.
La bthah ruh ban batai ïa ki Nongmihkhmat jong ki seng Nongshong dukan madan ba kin tip.