La wanpoi ki nongïalam ka HNLC ban ïakren ïasuk bad ka sorkar

Shillong:San ngut ki Nongïalam ka Hynñiewtrep National Liberation Council (HNLC) kila wan poi ha Nongbah Shillong ban ïashimbynta ha ka jingïalang ïakren ïasuk bad ka Sorkar.

Ïa kane la pynthikna da u Nongmihkhmat ka HNLC bad President ka Hynñiewtrep National Youth Front (HNYF) Bah Sadon K Blah mynta ka sngi Palei.
“Kine ki san ngut ki Nongïalam ka HNLC kila wan poi ha Jylla naduh ka 5 tarik Nailar bad kila sah ha IB jong ka MeECL kaba don ha Sumer. Kane ka dei kawei pat ka mawjam sha ka jingïakren ïasuk ka ban sdang hapdeng ka HNLC bad ka Sorkar,” ong u Bah Sadon.

Katkum ka jingong jong u, kine ki Nongïalam kila dep ruh ban ïakynduh ïa u Ksiang jong ka Sorkar Jylla u Bah PS Dkhar tang hadien katto katne sngi ba ki wan sha Jylla.

Haba kylli, u Bah Sadon ula ong “Mynta ka dei ka bynta ban ïapynbeit bad ka shong ha ka Sorkar ban rai halor ka jingïakren (official talk) khnang ba ngin lah pyntyllun noh shakhmat ïa ka. Ka Sorkar kam pat buh ruh ïa ka Tarik”.