Ki skhim sam ei, ka sorkar India

Ka la mih ka jing iakren kaba jur ha kine ki sngi, halor ki skhim sam ei bad katei ka kam, ka la poi sha ka jingbishar jong ka Supreme Court bad katei ka kashari, ka la kynthoh, da kaba ong ba ki surok ki sniew, ka ding ilektrik kam biang satia, hynrei, ki don kiba sam ei ia ki skhim sorkar, da kaba pynlutphut ia ka pisa paidbah.

Kane ka jingiakren, ka mih na ka jing sam ei, ka sorkar AAP, ia ki skhim bapher sha ki paidbah, kum kaba ot noh ia ka bai ding ilektrik, nangta kaba tyrwa ban siew shi hajar sha ki longkmie kiba shong iing.
Halor katei kajuh ka phang, ka sorkar BJP ruh ka bym kom satia, namar ba ka sam ei ia u khaw uba 5 kilo shi khlieh sha u paidlang ka Ri India bad kam dei tang kata, ka don sa shibun bah kiwei pat ki skhim, kiba sam ei ne sam duna dor sha ki nongshong shnong.

Hynrei ka jingsam ei ia ki skhim, ka dei ban don la u jong u pud bad ka dei ban trei kam ruh ia baroh bad haba kren ia ka kyntien “ioh ei” dei ban sdang shwa nalade bad kata ka long, ha kaba u President, u myntri rangbah duh, ki myntri jong ka sorkar India, ki myntri rangbah bad kiwei, ki im ialade da ka “freebies” ha kaba ki shong ha ki iing sorkar, khlem siew pisa bad nangta ki leit jingleit, ki ioh ei ia ka petrol, diesel, bai liengsuin, bai rel bad kiwei bad wat ia ka bam ka dih jongki ruh, ki shu bam ei, na ka pisa u paidbah.

Ym tang katta, sa ki skhim jong ki MP, ki MLA, ki dei kiba hap ban pynduh bad pynkut noh, namar ba ki dei ki skhim ki bym don satia ha ka mang pisa jong ka sorkar, lada dei ha ka sorkar India lane ha ka sorkar jylla bad kitei ki pynlut maphot, katba ki MP ne ki MLA ki mon bad kitei ruh ki dei ki skhim sam ei kiba jubor tam.
Namar ba katei ka kam, ka la poi ha Supreme Court, kumta ka don ka jingkhmih lynti na uba bun balang, ba kane ka skhim sam ei, ka dei ban iaid da ka lynti, kaba shong ain bad lada donkam ban pynkylla ia ka Representation of Peoples Act, ruh ba ka Parliament, kan hap ban leh ia kata.

Halor kane ka mat, ka sorkar jylla ruh kam shym la duna satia bad ka pyntrei kam bha ha kine ki sngi, ia ka skhim sam jing iarap ia ki nongrep, kaba 5hajar shi khlieh; ha kaba tang ka bai tungtap ruh kam pat iahap dor satia.