Ba la jot eh ka skul, leit iarap ka HYC da ki tin ia ka skul ha Umjari Mathan

Nongpoh: Ki nongialam ka HYC Ri Bhoi, ha ryngkat ka jingiatreilang bad ki HYC Lai shnong kiba don ha ka thain Umden, ki la leit ban iarap ia kawei ka skul, da kaba ai sngewbha da ki tin sopiing.

Katei ka skul kaba la ioh jingiarap na ka HYC, ka dei kaba tip kum ka Hujon English School, kaba don ha shnong Umjari Mathan ha Ri Bhoi bad ka nongrim kaba la pynlong ia ki dkhot ka HYC ban leit iarap, ka dei hadien ba ki la iohi ba katei ka skul, ka la jot shaba palat eh.

U Bah Donbok Maiong, President ka HYC Lai Shnong, u la ong ba ka nongrim kaba la pynlong ia ka seng ba kan leit iarap ia katei ka skul, ka dei hadien ba ki la iohi ba katei ka skul ka la donkam shisha ia ki jingiarap, na ka bynta ban iada na ka jingjaw um ha ka por ba hap slap. Ha katei ka sngi ba ka HYC ka la leit ban noh synniang ia katei ka skul, la sakhi da ka jingdon ki riew rangbah ka thain, ki longkmie lem bad shibun kiwei pat.