Shah thwet pulit u rangbah na Sohliya, ba u jah ha ryngkat bad ka kali

NONGPOH: U Superintendent of Police, Ri Bhoi District, ha ka kyrwoh kaba la phah sha ki lad pathaikhubor, la pynpaw ba ki la thwet ia uwei u rangbah uba la tip kum u Bah Lassing Kharkylliang, na ka shnong Sohliya, namar ba u la jah ha ryngkat bad kawei ka Mahindra Pick-up kaba don ia u number ML-10-C-4619 bad uba la jah bad katei ka kali naduh ka 28-03-2022 bad haduh mynta ym tip shano u don.

Katei ka kali ka dei jong ka Kong Ranisha Kyrsian, ha kaba ka la ai sha utei u rangbah, na ka bynta ban phah kamai, kata naduh ka 28-03-2022, hynrei haduh mynta u khlem wan pynphai shuh ia katei ka kali bad ia u briew ruh ym tip shaei u don.

Haba iadei bad katei ka jingthwet ia utei u rangbah, ka dei ruh halor ka Ejahar kaba la ujor da katei ka longkmie ha ka 16-06-2022 da katei ka longkmie na ka shnong Myrdon Mawtari, Ri Bhoi, kaba la ujor sha Umsning Police Out Post.