Phah dorkhas ka Seng Samla Raid Nongtung sha u DC, ban phaikhmat ia ka jingeh ki paid khappud

Nongpoh: Haba shimkhia halor ka jingeh kaba la kynduh da ki paidbah kiba shong ba sah ha kito ki shnong khappud bad kiba hap hapoh ka Raid Nongtung, mynta ka sngi ka Seng Samla Border Area Raid Nongtung, ka la phah jingthoh sha u Deputy Commissioner ka Ri Bhoi, na ka bynta ban kyrpad ia u ba u dei ban phai khmat lem ha ka ban pynpoi ia ki kam pynroi jong ka sorkar Meghalaya sha kitei ki shnong khappud.

Ha katei ka dorkhas kaba ki la phah sha u DC ka Ri Bhoi, katei ka Seng Samla Border Area Raid Nongtung, ka la kyrpad ia u DC ba u dei ban iarap bad ban pynkren sha ka sorkar, bynta ka ban shna pynbha ia ka surok na Mawlasnai sha Jatalong, namar ba ka la sniew palat bad kaba la wanrah jingeh ha ka leit ka wan ki paidbah. Ki la kyrpad ruh sha u DC, ba u dei ban pynioh ia ki Solar Light System hapoh ka shnong Umsohlaper, ka shnong kaba don 52 tylli ki longing bad kaba dei ka shnong kaba kam pat ioh bording kat haduh kine ki sngi na ka sorkar Meghalaya, nalorkata ki la pynpaw ruh ba ki solar Light System ka sorkar Meghalaya ha Sabuda, ki la sniew palat bad kaba la donkam ia ka sorkar ba ka dei ban ai noh da kiwei kiba thymmai.

Katei ka kynhun, lyngba ka jingthoh kaba ki la phah sha u DC, ki la kyntu ruh ba u dei ban shim khia ban phah pynsangeh halor ka jingthmu ka Assam ban pynpoi bording ha ka shnong Sabuda bad Jatalong, namar ba ki paidbah ha kitei ki shnong kim kwah ia ka bording na ka jylla Assam.