T.30 lak, shah dawa pisa ka RKM

Shillong, 23 Nailar:
Ka Ramakrishna Mission ka la shah dawa pisa haduh T.30 lak tyngka ha ki seng lehnoh ha ri lum Garo. Ia katei ka shithi dawa pisa la leit ban ai sha katei ka Mission da ki briew, ki bym shym la ithuh satia, katei ka Misson kaba la shah dawa ka dei kaba don ka skul bad ka jaka ri khun swet ha Kuralbanga, kaba hap ha West Garo Hills ha khappud ka Meghalaya bad Assam. Ha katei ka shithi dawa pisa la ong ba dro da ka dur ka suloi bad la thep ruh bad u kuli u bym pat pyndonkam.”Ngi ngeit ba katei ka dei ka kam pyntriem jong ki runar , ngin tohkit ia katei ka kam haduh ba ngin da ioh kem ia ki nong dawa pisa” ong u officer-in-charge ka Kalapani outpost. Katei ka mishon jong ka Ramakrishna kaba don ha Kuralbanga ka ba don ia ka skul kaba ki paidbah kim donkam ban siew eiei bad ka don ruh ia ka jaka ri khunswet. Kane ka dei ka sien kaba ar kaba ki Mishon ha ri Lum Garo ki la shah dawa pisa, ka jingjia kaba nyngkong ka la jia mynta hi u snem ha kaba ki runar ki la prong jubor ha iing u wei u nonghikai ba la shongthait ka Don Bosco school teacher u Gaganendra Sanyal kaba don ha Kuralbanga ha kaba la rahbor ia u da kaba pynap suloi bad hadien la pyllait pat ia u hadien ba kiba ha iing ki la siew ia ka pisa ba la dawa.