Balei ym don ED, ia ki MLA skhim?

Ka Enforcement Directorate (ED), ka bunkam bha ha kine ki sngi bad la iohi, ba ka la shu khynra naphang ia ki iing, ki riew sain pyrthei; khamtam, ia kito kiba don ha ka liang pyrshah bad kane ka jingleh khlem pep, ka la pyn kyndeh mynsiem ia kiba bun ki riew sain pyrthei.

Hynrei, ka mat kaba kongsan bha, ba ngin iakren hangne, ka long, ba balei sha ka ED, kam wan tohkit lapmiet noh ia ka rukom pyntreikam ia ki MLA skhim ha Meghalaya bad ngim dei ban klet, ba uwei U MLA u ioh T.2.5klur bad tang ha ka shisnem bad ka jingngam ka pisa u paidbah ha katei ka skhim ka long T.150klur bad ha kat katei ka jinglut, ka la dei ia ka ED, ba kan wan peit, la u paidlang ka jylla, u ioh aiu bad u la nang kiew ne em ha ka ioh ka kot, na ka jingdon kane ka skhim?

Ka jubab ia kane ka long, ba katei ka 2.5 klur, ka kylla long ka pisa tuh kaba jubor tam, ha kaba ia ka pisa la shu sam nokot ha kti jong u briew shimet bad u don uba ioh T.5hajar, u don uba ioh T.10hajar bad kumta ter ter bad don sa kito kiba thied miej, thied shuki, thied syntex bad kiwei kiwei, ha kaba hangtei ruh, ka don ka jing ia kamai pisa ka bym kai shuh, na u nongdie bad u nongsam.

Kumta lada ia ka kam pynmih kotkhubor ka Sonia Gandhi, la leit ban tohkit bad ia ka jingbun pisa, U Partha Chatterjee, la leit ban kurup lut; kumta hangne lei, ka dei ka pisa jong u paidbah bad ka ED, ka dei ban wan peit kai, ia kiei ki kam, ba ka T.2.5klur, ka la pyn myntoi ia u paidlang ka jylla, haduh ha kine ki sngi, ne ioh ka shu kylla long pynban, tang ka pisa ban ioh vote jong U MLA.
Kan jin da la bha ruh, ia kano kano ka kynhun sengbhalang, ba kan mih shakhmat, ban wad jingtip kai, halor kane ka tamasa sam pisa, da ka MLA skhim bad ban iakren bad ki nongthep vote, ha ki Constituency bapher bad lada kan don shisha katei ka jingtih tyllong, na ki paidbah, kan sa long ka kam shutia kaba jubor tam, ha kaba na katei ka klur, la pynlut, ha kaba thied tarpal, ha kaba sam shuki, ha kaba sam syntex bad kitei ki dei ki tiar, kiba shongdor da ki spah lane da ki hajar bad kumta, ia katei ka pisa, la shu pynsyrwa, ha ki jinglut ki bym ai jingmyntoi satia ia u ioh, namar ki dei tang ki tiar ki bym phuit ler haei haei ruh.