Ki riew sain pyrthei, ki kylla nongkhaii

Ha kane ka kynti, ngi la hap thoh noh ia ka mat, kaba ki ong, ba ki riew sain pyrthei, ki kylla long ki nongkhaii bad ia katei, ngin wan rah ia ki katto katne ngut, ki riew sain pyrthei, kiba shah tohkit, halor ka jing pyn donkam bakla ia ka pisa lane ka spah ka phew jongki, ha kaba ialeh nongkhaii lane ha ki kyndon jong ka Prevention of Money Laundering Act (PMLA).

Ha kane ka ain, la pynngat ia ki shikmie shikhun; ka Sonia bad U Rahul, ha kaba la kynnoh ba ki shim ia ka pisa, na kawei ka kotkhubor, kaba kyrteng ka National Herald bad kaba ka Enforcement of Directorate (ED), ka kynnoh ba ka seng Congress, ka ai ram pisa ia katei ka kotkhubor kaba T.90 klur bad katei ka dei ka pisa, ka bym shym la siew satia haduh mynta; hynrei haba iakren ia kane ka mat, ngi hap ban kynmaw, ba katei ka dei ka mukotduma U Subramaniam Swamy bad kam dei satia, ka jing tohkit jong ka sorkar.
Sa u riew sain pyrthei, ka West Bengal, U Partha Chatterjee, ula shah kem ha ka ED, hadien ba la lap ia ka pisa kaba T.50klur na iing jong ka paralok jongu bad katei ka dei halor ka jingshah kynnoh, ba u donkti ha ka kam bamsap, na ka jingthung nonghikai.

Ym tang katta, sa U Sanjay Raut, u nongialam ka Shiv Sena, u don mynta ha ka jingshah tohkit ha ka ED hi, halor ka jingshah kynnoh ba u donkti ha ka kam bamsap die khyndew kaba palat T.1,000klur bad nangta la ioh kurup ruh ia ka pisa na iing jongu, kaba T.11.50lak.

Kam dei tang kata, ngi hap ban kynmaw ruh, ba U Satyendra Jain, U Karti Chidambaram, U Ajit Pawar, U Abhishek Banerjee, ki la shah tohkit bad shah pynngat ain lut khoit ha katei hi kajuh ka tnat tohkit ka sorkar India.
Kane ka mat, ka don shibun ki jnit ki jnat ban iakren, hynrei na ki jingjia, ha kine ki sngi, ka pyni shai ba ka por, ka la dei ia ki riew sain pyrthei, ba kim dei shuh ban don bynta ha kino kino ki kam khaii bad ki dei ban trei beit, tang ia ka kam nongmihkhmat jongki bad ba kin pyndep hok, ia la ka jong ka kamram.
Ha Meghalaya, la iohi ba ki MLA, ki myntri sorkar; ki dei ki nongkhaii heh, kiba kamai da ki hajar klur bad na kine ki jingjia, kan sa poi ka por, ba ka ED, kan sa jyrwait shkor ia kiba bun ki riew sain pyrthei hangne ruh.