Ym don ka jingpynmih dewiong, ha ki saw snem ba ladep ha Meghalaya, iathuh ha Parliament

Shillong: Ka jingdon u dewiong ha Meghalaya, katkum ka Coal Inventory of India kumba la pynmih da ka Geology Survey of India (GSI) ha ka 01.04.2021 ka long 576.48 MT.

Katkum ka jingtip ba la ioh na ka Coal Controller Organization (CCO), ym shym la don kano kano ka jingioh jingtip shaphang ka jingpynmih dewiong ha kine ki 4 snem ba la dep ha Meghalaya.

Ka National Green Tribunal, ha ka hukum jong ka ha ka 09.06.2014, ka la shem ba ka la don ka jingpynjaboh ia ka lyer, ka um bad ka mariang namar ka jingtih dewiong beain, ka bym don kano kano ka kyndon bad kaba long palat pud kaba jia ha ki jaka bapher bapher jong ka Meghalaya.

Khnang ban pynneh ia ka mariang ha Meghalaya, ka Supreme Court ha ka rai jong ka ha ka 3.7.2019, ka la rai kumne harum:

Ki kyndon jong ka The Mines Act, 1952 ki dei ki ba hap bud shuwa ban pyntreikam ha ki par dewiong. Ki kyndon lane ki Coal Mines Regulations, 2017 ki don ruh ki bynta bapher bapher kiba dei ban bud haba pyntreikam ia ka par dewiong da uno uno uba la ioh jingbit ban tih dewiong na ki par.
Ka jingpyntreikam ia ka Mines Act, 1952 bad ki Regulations, 2017 ka dei kaba ka jylla ka hap ban pynthikna na ka bynta ka bha ka miat jong u paidbah.
Katkum ki kyndon ba la pyntreikam lyngba ka notification ha ka 15.01.2016 ba la pyllait hapoh ka Environment (Protection) Act, 1986, donkam ia ka jingioh jingbit environmental clearance haba pyntreikam kaba iadei bad u dewiong ha ka jaka kaba heh katno katno. Katba dang pyntreikam ia ki kyndon ban tih dewiong ha ki Distrik Rilum jong ka Meghalaya, ka Sorkar Meghalaya ka hap ban pynthikna ia ka jingbat ia ka MMDR Act, 1957 ka Mines Act, 1952 bad ka Environment (Protection) Act, 1986.
Ha ki Distrik Rilum jong ka jylla Meghalaya na ka bynta ka jingtih dewiong ha ki jaka shimet ne ki jaka shnong, kam dei ka Sorkar Jylla ka ban ai jingbit mining lease hapoh ka Chapter V jong ki Rules, 1960, hynrei u dei u trai shimet, ka shnong ba dei trai ia ka jaka, kiba dei ruh ki trai jong u mar poh khyndew, ki ban ai ia kane ka jingbit ban tih dewiong katkum ki kyndon ha ka Chapter V jong ki Rules, 1960 hadien ba ki la ioh jingbit shuwa na ka Sorkar Pdeng lyngba ka Sorkar Jylla.
Ka Sorkar Jylla ka la pyntreikam ia ka rukom treikam ba la pynkhreh da ka Committee ba la thung da ka National Green Tribunal bad ba la ai jingmynjur da ka NGT, ban khang noh ia ka jingplie ia ki par kiba la sdang shuwa ka jingkhang ba la pyntreikam da ka NGT ha u snem 2014 bad ka dang wanrah ia ki lad jingiada ha ka kam ban plié ia ki par ha kiba dang don dewiong ba dang lah ban tih ba lah ban pyndonkam nangne shakhmat da kaba bat ia ki ain bad ki kyndon.

Ka Sorkar Pdeng kam pat pynlong ia kano kano ka social auditing ha Meghalaya.

Ia kane ka jingtip la ai da u Myntri Sorkar Pdeng uba dei khmih ia ka tnat Coal, Mines bad Parliamentary Affairs, u Pralhad Joshi ha ka jubab ba shu thoh ha Rajya Sabha mynta ka sngi.