Pynsyrwa ia ka pisa ka Dong Mihngi

New Delhi, 21 Nailar:
Ha jaka ban ynlut na bynta ki jingdonkam ba kham kyrkieh eh kaba ai jingmyntoi ia u paid bah, pynban ka sorkar ka pynlut da ki klur klur tyngka na ka bynta ki tamasa phlim, tamasa bhabriew bad ki jingialeh kai bapher, ha ka kyrteng ban kyntiew ia ka thain shatei Lam Mihngi, ong ki riew shemphang ba kyn thup ia u PP Srivastava u dkhot barim ka North East Council (NEC). Katkum ka jingong ki riew shemphang ki la ong ba la pyndonkam bakla bun ki pisa kiba la ai sha manla ki tnad sorkar kynthup ka tnad Development of the North East Region(DoNER) ha ka jaka ban pyndonkam hok ia ka pisa na ka bynta ka jingmyntoi u paidbah kum ka kam kaba iadei bad ka jingkiew ki kam pyntriem, ka jingduna ki jaka sah ki samla pule bad kaba kordor eh ka dei ka jingbym ioh kam ioh jam ha ki sorbah.
“Ka sorkar ka dei ban kyndit noh ba ka jingmih na kitei ki jingpynlong ia ki kam kai kum ka Film Festival ka dei ka kam kaba ki paidbah kim da donkam eh, ka pangmet ban iohi ba ka pisa u paidbah kaba dei ban pyndonkam ha ki jaka ba donkam kyrkieh kum ban ai lad ia ki samla ka thain shatei Lam mihngi ban ioh kam ioh jam ha ki sorbah la pynsyrwa kai pynban ha ka kyrteng ka jingkyntiew ia ka thain da kaba pynlong da ki kam Film Festival, Fashion Show bad ki jingialehkai Sports” ong u P.P. Srivastava.
Katkum ki lad khubor la ioh jingtip ba ka sorkar ka la pyllait T.40 klur tyngka na ka bynta ka North East Film Festival kaba dang iaid ha nongbah Delhi, kaba ka sorkar ka ong ba ka dei ka rynsan ia ki samla ka thain shatei Lam mihngi ban pyni ia ka jingdonsap bad ka jingtbit jong ki ban shna Film ha kaba tang 6 tylli ki jaitbynriew la ailad ban ia shim bynta.
U M Amarjeet Singh, Associate Professor ha Jamia-Millia –Islamia kaba dei ka jaka jong ka North East Studies and Policy Research u la ong ba ka thain shatei Lam mihngi ka la kylla sohpduang ha kaba bun ki pisa la pynsyrwa kai bad la pynlut ha ka kyrteng jong ka. “Bunbah ki rynsan ki bym shohtoh la pynlong ha sorbah ha ka kyrteng ka bha ka miat ki briew ka NE” ong u Singh.