Kurup drok ki pulit na u pulit langrut ka WGHD

Shillong:Ka kynhun Anti-Narcotics Task Force (ANTF) jong ki Pulit ka West Garo Hills mynta ka sngi, ka la ïoh ban kurup haduh 10.53 gram u heroin na ka met jong uwei u Pulit Langrut ba tip kyrteng u Ajay Chettri.

Une u drok u dei uba phah da uwei pat u nongkhaïi drok ba kyrteng u Khrawbok Diengdoh ba na Dongkamon, Nongmensong, ïa uba ki pulit ki la dep ban kem.

Ki Pulit ki la kem ruh ïa u nongbud bad u trai jong kawei ka bos night super ba kyrteng u Arup Nag ba na Upper Babupara, Tura, Suresh Burman (59) na Beldarpara, Tura bad u Shankar Dalu (33) na Mukdangra, Garobadha ban tohkit halor kane ka kam.

Ki Pulit ANTF ki la kurup ïa kawei ka mobile phone bad ka sim card, ka bos ML-08E-6111 bad kawei ka Maruti Suzuki Car AS-01AB-6116.
Halor u Pulit Langrut u Ajay Chettri, ka tnat Pulit ka la sospon ïa u na ka kam, ong ki heh Pulit.
Da ka jingpyntip ki Pulit ka West Garo Hills, ki Pulit ka Nongbah Shillong ki la hiar khynra ïa ka ïingsah u Khrawbok bad ïoh kurup katto katne u drok heroin na ka met jong u.