“Yn synshar marwei ka NPP ha u 2023” ong u Bah Macmillan Byrsat

NONGSTOIN: U MLA jong ka Nongstoin Bah Macmillan Byrsat u ba bat ruh ia ka kam kum u President ka NPP District Unit jong ka West Khasi Hills, u la ong ba ka National Peoples’ Party (NPP) kan sa synshar tang marwei ha u 2023 bad tang na Khasi & Jaintia Hills haduh 18 ngut kin jop.

U Bah Macmillan Byrsat haba kren ha ka jingialang jong ka party NPP hapoh Rambrai u la ong ba ka NPP kan sa sar lut iaka jingjop na West Khasi Hills baroh 3 seat lada peit iaka jingling jingman ha kine ki sngi ha kaba ki paitbah katba nangmih ki sngi ki la wan ban pyniasoh sha ka party NPP kaba dei tang kane ka party ka ban ai ka jingkyrmen iaki paitbah.

U Bah Macmillan Byrsat haba kren ha katei ka jingialang kaba wan ban pyniasoh da ki hajar ngut ki nongkyrshan jong u Bah Kimfa Marbaniang bad Bah Bajop Pyngrope u la iathuh iaki nongrim jong ka party NPP kaba ieng ban iada iaki hok jong ki rit paid hapoh ka ri India baroh kawei, u la iathuh ba tang ka NPP kaba dei ka National Party kaba la ialam da u Niam khristan bad dei tang kane ka party kaba iada iaki hok jong ki rit paid hapoh ka ri India.

U Bah Byrsat u la ong ruh ba kiba bun ki lah ban kynthoh katba mon iaka party NPP hynrei ka jingshisha kan sah hi ka jingshisha namar kadei tang kane ka party kaba ialam iaka jingsynshar hapoh ka jylla kaba lah ban leh ia shibun ki kam kiba kiwei ki sorkar ba mynshuwa kim lah bad kimnud ruh wat tang ban ktah.

“Lada phai ha ki kam ia pynbeit pud kaba la neh da ki phew snem, ka issue kharmetor, ka jingialeh ban ioh iaka ILP, ka jingkhot iakren iaka seng kieng atiar ka HNLC dei tang kane ka sorkar ka nud ban leh ne kaba nud ban shim ia ki jingkit kiba khia khlem da khein iaki kam pynroi kiba tuid ha ka thain jan man kip or” ong u Bah Byrsat.

Ha katei ka sngi u Bah Macmillan Byrsat u la pynkhamti ruh ia u Bah Bajop Pyngrope kum u Working President jong ka NPP Rambrai Block ka ban long ruh kum ka jingpynkhlain shuh shuh iaka party NPP hapoh katei ka thain.