Saw tylli ki smart meter bad ki don la ka jong ka dor, pynshai U SMR ia ka HYC

Shillong: U bah Prestone Tynsong u myntri ka tnad bording ha ka jylla u la ong, ba ka dor jong u smart meter, kaba ula iathuh hapoh ka ingdorbar ka dei ka dor tang na ka bynta u smart meter suda, khlem da khein ia kiwei kiwei ki tiar kiba donkam lang ha ka jingpyndait ia u smart meter.

Haba ia kren bad ki lad pathai khubor na ka liang u bah Tynsong u la ong “Ka HYC ka la ioh jingkhein ka ba dei na ka bynta ki tiar kiba donkam lang baroh haba pyndait ia u smart meter “.

U la bynrap “U smart u don saw tylli la ka jong ka dor bad ka jingpyndonkam ia u smart meter ha la ka jong ka phase kan long kat kum ka jingdonkam ia ka bording”. “U don u single phase smartmeter bad u three phase Smart meter, u DT meter, LT meter bad HD meter ha kaba ka dor kan long la kajong”u la bynrap.

U bah Tynsong u la jubab “Ka jubab jong nga hapoh ka ingdorbar ka long ka ba dei namar ba ka dor jong uwei u single phase smart meter ka dei T.3750 kaba lait ia ka bai pyndait ia ki tiar ki tar, ka bai synduk meter bad ka GST”.

“Lada ki kylli katno ka dor jong baroh ki tiar ki ba donkam ban pyndait ia u smart meter, nga la jubab ba kan shongdor T.5889 namar ka dor u smartmeter ha ryngkat ka synduk meter ,u wire bad ka jingpyndait ia kine ki tiar bad kiwei kiwei ki tiar kynthup ia ka GST” u la bynrap.

U la ong ruh “Kumjuh ia u Three phase Smart Meter ka dor u smart meter kan long T.11,238 kynthup ia kine baroh ka jingdonkam ban pyndait ia une u meter”.

“Ka HYC ka la kulmar haba ka ioh ia ka jubab lyngba ka RTI ia ka dor namar ba nga iathuh ia ka dor tang jong u smart meter suda khlem da khlein ia kine kiwei pat ki jingdonkam ki ba donkam lang ha u smart meter”u la bynrap.

“Ka jingpyndait ia u smart meter kan long ka ba ym donkam ban siew eiei hynrei kane ka dor ka ba nga iathuh mynta ka long ka jingpynlut ka ba na ka sorkar jylla ka hap pynlut na ka bynta u smart meter”u la ong . “Ka mang tyngka ka ba ngi ioh na ka ADV bad ka pisa kaba long 20% na ka jingsei na ka sorkar jylla ban pyndait ia ki smart meter ha ka jylla khlem donkam siew eiei”u la ong.