Wan poi U Bernard sha Tura, ioh kurup sa ki tiar siat bom bad ki khnam

Shillong:Ki pulit jong ka West Garo Hills myn hynnin ka sngi, ki la wan ialam noh ia u Bernard N Marak, u vice president ka Bharatiya Janata party (BJP) sha Tura ha ka sngi palei, ia kane la pyntip da u Superintendent of Police ka West Garo Hills u V.S Rathore.

U V.S Rathore u la iathuh ruh ba ia u Bernard, yn dang donkam ban leh ia ka medical examination ka ban bud sa ka jingleit ialam ia u hapoh ka ingkashari.
U V.S Rathore, u la iathuh ruh halor ka jinglap sa ia ki tiar pynbthei hapoh ka Rimpu Bagan, da ki kynhun ka District Child Protection unit bad ki pulit ha ka jylla mynhynnin ka sngi.
“Mynta ka sngi, ki kynhun jong ka District Child Protection Unit bad ki pulit ha ka jylla ki la hiar sha Rimpu Bagan ban shim ia ki jain bad ki kot pule jong ki khynnah kiba la ioh pyllait na kane ka jaka.

Ki pulit ha ka sngi palei ki la ioh ban shim custody ia u Vice President ka BJP Meghalaya u Bernard N Marak na ka bynta 8 sngi .

U Superintendent of Police ka west garo Hills u V.S Rathore u la iathuh ba u Chief Judicial Magistrate u la ai 8 sngi ia ki pulit ba kin tohkit, hadien ba la wanrah ia u hapoh ka ingbishar.

Ha ka jinglum jing lang ia kine ki tiar jong kine ki khynnah, ki pulit ki la lap sa ia kawei ka jingkhang kaba rit bad haba la plie ia kane ka jingkhang la lap ia ki tiar ia siat bad kumjuh ia ki tiar pynbthei.
Na kane ka jaka la lap ia ki 35 tylli ki Gelatin sticks (explosive substance), 100 tylli ki detonators, 4 tylli ki cross bows bad 15 tylli ki khnam (arrows).
Ia baroh kine ki tiar la kurup da ki pulit ha ka jong iadon ryngkat ki sakhi, kiba dei ki riew shimet bad yn sa rah ia kine shapoh ka ing bishar.
Na ka liang ki pulit kin pynrung ruh ia ki jingkynnoh pyrshah u Bernard N Marak u ba la tip kum u Rimpu hapoh ka Explosives Substances Act, 1908.