“Wat kren ianga” ia khluit tar ka Sonia bad ka Smrti ha Parliament

New Delhi:Ka jingkren jong U Adhir Ranjan Chowdhury, ha Parliament, ha kaba u ong ia ka President ka Ri India, kum ka “rashtrapatni” ka la pynmih ia ka jing ia khluit tar hapdeng ki dkhot liang pyrshah bad ki dkhot jong ka seng BJP ha ka iing dorbar Lok Sabbha.

U Ranjan, ula ong ba katei ka jingkren, ka dei ka jingbtuid jong u thylliej jongu, ba u kynnoh bakla, hynrei, ka BJP, ka kynnoh ba katei ka dei ka jingkren niew bein jong ka seng BJP ia ka President.
Na ka liang ka seng BJP, ka dawa ia ka Sonia Gandhi, ba ka dei ban pan map na ka bynta ka jingkren U Adhir Ranjan Chowdhury, ha kaba ka la ialam sha ka jing ia patied nia, hapdeng ka Sonia Gandhi bad ka Smriti Irani, nongialam BJP ha Parliament, mynta ka sngi.

Na ka liang U Gaurav Gogoi, nongialam jong ka seng Congess, u iathuh ba ha ka por ba la pynwai ia ka Lok Sabbha, ha ka por 12baje shiteng sngi, ki dkhot ka BJP, ki ia pyrta bad dawa ia ka Sonia Gandhi, ba ka dei ban hiar shuki mardor, na ka jingkren jongu Adhir Ranjan Chowdhury.

Ha katei ka por, ka Sonia Gandhi, ka leit iakren ia ka Rama Devi, ha kaba ka iathuh ba u Chowdhury, ula pan map bad ka lyngngoh ruh, ba balei ka leit rah ia ka kyrteng jong ka Sonia ha iing dorbar. Ka dei ha katei hi ka por, ba ka Smriti Irani, ka la leit kem ktien ha ka jingiakren bad ka dei ha kane ka por, ba ka Sonia, ka la kem ktien bad ong “wat kren ianga”. Hangta, ka jing ia khluit, ka la weng hapdeng ka Sonia bad ka Irani, kumba 2 haduh 3 minit.

Mar kumta, ka Mahua Moitra, na ka TMC, ka Supriya Sule, na ka NCP; U Pralhad Joshi bad U Arjun Meghwal na ka seng BJP, ki la leit ban pynjem ia kitei ki arngut.
Ka Rama Devi, nongialam ka seng BJP, ka ong “Ngin nym pan map satia, tad haduh ba ka Congress, kan pan map” bad ka ong “Ka Sonia Gandhi, ka iakren iangi da ka sur kaba khor bad nga ong ia ka, ba ka dei ban kren ia ki nongtrei parti jongka bad nga ong ia ka, ba u myntri jong ka seng jongka, un sa pynshai ia ka, ia kaei kaba ula kren bad ka da ong ruh ia ka Irani, ba kam dei ban kren ia ka”.
Ka Rama Devi, ka ong “Ka Sonia, ka la dei ban ong, ba ngi la bakla bad ngi dei ban map nap. Hynrei ka Sonia, ka pyni, ia kaba kum katei ka jinglong jongka bad ka dei ka kamram jong ki kmie ki kpa, ban pynbeit, lada ki khun ki bakla bad ban batai ia u, ia kaei kaba ula leh bakla”.