Ki jaka die doh, kiba la sop skhem bha

Ka Meghalaya high court, ka la pynmih ha ki khyndiat sngi ba ladep, ia ka hukum, ba ki dukan die doh, ki dei ban ker bha ia ki dukan jongki lane ba ki dukan, kin nym long rynghang satia, na kaba ju long baroh shi katta.

Ka rukom die doh, ka sdang shwa na ka die doh kyndang bad ka ju long ka jingmlien, ba uba thied, u da peit bad sngewhun mynsiem hi ban da ktah shwa bad pynkhih sha ka mon ka diang, ha shwa ba un shim ia ka doh bad ka ju don ruh ka jing ia pan dor, ha kaba u nongdie u la oh dor, katba u nongthied, ynda ula ioh twad ia ka dor, u sa khlieh dor lem.

Katei ka la duh bad mynta, ka la poi sa ka die kilo bad ha ka die kilo, khamtam ha Iewduh, la ju iohi, ba ki nongdie, ki niewbein ia ki nongthied ne ia ka pisa jongki, ha kaba uba thied doh met, u ju ioh shibun sa ka doh tam bad katei ka dei kaba ju jia bha ha man ki dukan, ha kaba u nongdie u leh, katba u sngewbit bad kaba kham ijli, ka long, ba ynda pyrshah ia katei ka jingleh ruh, ka poi sa ka jing ia pyneh ruh.

Mynta ka dor jong ka doh ka la rem shibun bad ka dor ruh ka iapher, hapdeng ka dohmet bad ka dohshyieng bad kumta ter ter bad lyngba ka rai jong ka High Court, ka jingia jied ia ka doh, ka la shitom bad ka por ban ia peit ia ka rukom thew, ka la nang jynjar bad ka la dei beit, ha ka mon laitluid u nongdie.
Kumta, ka la dei ia ka tnat kaba peit ia ka die ka thied, ba kan buh noh da ki dukan die lang, ia ka doh, ha kaba uba die dohmet, un buh ha kawei ka jaka bad ban thew lypa ruh, ia kaba shi kilo ne ar kilo bad kumta ter ter bad kan nym don shuh ka jing ia ot ne pyndap da ki dohtam, kiba shu tam na ka dieng shain doh.

Kam dei tang kata, ka la dei ruh ia ka tnat Food & Civil Supply, ba kan peit ba ka doh, ka dei ban wan, na ka jaka ot doh, kaba la ithuh da ka tnat ri jingri bad ba kam dei ban long kaba la sahmiet bad nangta ban buh da u thah lane da ka freight, ba kan nym sma iewkhong ka doh, khamtam, ha kine ki sngi kiba shit.
Lyngba jong katei ka hukum jong ka kashari, ka donkam namarkata ba kan don ka jing pynbeit kaba thikna bha, ia ka rukom die bad thew ia ka doh, ba u nongthied, un ioh ia ka mar kaba u hun mynsiem bad kaba iahap bad ka dor kaba u siew sha u nongdie.