Ka jingbishar, ka la poi sha nurok ka ksew

Ka jingbishar hok, ka la nang jngai ha kine ki sngi bad ia katei, la kren ruh da U Chief Justice ka Supreme Court ka India, ha kaba u kynnoh ba ki nongthoh khubor, ki pynlong ia ka Kangaroo Court, ha kaba ki tih jylliew ia kino kino ki jingjia, katba kum ka jingsngew bit ki nongkylli jingkylli bad kato ka pyni, ba u nongthoh khubor, u tip lut u nang lut bad ba ym don da kiwei kiba kham stad ban ia u.

Ki don ki khubor kiba kine ki news channel, ki kham sngew bang bad kham shoh jingmut ha ki, kin tih tyllong, haduh ba sha kamra thiah jong ki briew ruh, kin leit wad khlem aili bad sa ki nongkren, kin wad ia kito kiba ki kham iahap jingmut ba kin ioh ban pynrem ne pynksan ia uno uno u briew uba ki shonkhmat.
Ka jingdon ki tnat tohkit bapher jong ka sorkar India, kum ka ED, NIA, CBI bad kiwei, ka la nang ailad ban biah phongrai, ia ka jinglong jingim shimet jong u briew halor ka jingtohkit bad ka jingkem beain ia kitei kiba shah suba, khlem da ailad ia ka kashari, ba kan pyndep ia la ka kamram.

Kine ki jait jingjia, khlem pep, kin buh ia ka jingjah burom kaba khraw ia ka jingim shimet jong u briew, lada la ailad ia ki nongthoh khubor, ba kin shim bishar ma ki, ia kano kano ka jingjia, ha ka jaka, ba kin ai ia ka khubor bad kine ki jingjia ne ki jing thad burom ia u briew, la ju iohi ruh ba ki ju kylla khongpong, ynda haba ka kashari, ka wad ia ki jingshisha, kumba ka la jia ia U Abram (u khun U Shah Rukh Khan), ha kaba ka jing kynnoh shalan drok ka dei kaba shu thok pynban.

Kane ka jingjia, kam jia tang ha ki news channel, ne ki tnat kiba la buh da ka sorkar India; hynrei ka ia syriem bha ha kaba iadei bad ka jingshah kem jong U Bernard Marak, MDC jong ka seng BJP, ha kaba la iohi, ba ki pulit bad wat ka komiti jong ki MLA ruh, ba ki la shim rai kyrkieh ban rai pynrem ne ban pynbudnam ia utei U MDC, khlem da ailad ia ka kashari, ba kan tih bniah ia ki jingjia baroh.

Ka synshar paidbah, jong ka India, ka la bynta ia la ki jong ki jong ki bor, ha kaba ka iing dorbar, ka dei ban thaw ia ki ain, ka sorkar, ba kan synshar khadar, katba ka kashari, ba kan bishar ia kano kano ka jingbakla jong kitei ki ar tylli ki bynta; hynrei lada kitei ki lai, ki la knieh noh, ia ki bor jong kiwei pat, kumta ka jing synshar, ka la poi sha nurok ka ksew.