Ka jingshah kem jong U Bernard Marak, MDC bad uba dei ruh U Vice President ka seng BJP, ka la bthei, da ka jing ia kynad hapdeng ka BJP bad ka sorkar MDA jong U Conrad Sangma bad ka daw, ka long na ka jingleit talasi ia ka iing jong U Bernard, ha kaba ki pulit, ki kam, ba ki la lap ia shibun ki kam beain.
Haba peit ia kane ka jingjia, ngi iohi, kumba ki dak ki shin, ki kdew ba hangne ruh, ngi la don ia ki tnat khynnah jong ka ED, CBI, NIA bad kiwei, na bynta ban iarap ia ki kam iashut sain pyrthei jong ki kynrad, kiba don ha ka bor bad kumta, lada kane kan iai bteng, kan sa long ka dak kaba sniew bha ha ka jing ia pyni bor sain pyrthei ha ki sngi ki ban sa wan.
Ha ka jingleit khynra jong ki pulit ia ka iing sah U Bernard, kaba sngewkhia shibun eh, ka long ba ki kynnoh, ba ki don 5,6 ngut ki khynnah rit, kiba don bynta ha ka kam khaii met, lane ba la pyniaid da utei U MDC bad lada ka dei shisha kumta, kan long kaba sniew shi katdei, ia utei u nongialam paidbah, ba un im ha katei ka kam die met.
Lait nangta, kiwei pat ki jing kynnoh, kim long satia kiba pher, ba lada u briew u buh kyiad ha iing lajong, kam dei ka kam beain, namar ka kyiad, ka dei kaba lah ban thied pahuh da ki trok ruh bad lada iakren ia ki 73ngut kiba shah kem na iing sah U Bernard; hangta ruh kam mut ba kin dei ki nongdie met suda, namar ba ka BJP, ka kren shai, ba katei ka dei ka jaka sahmiet jong ki briew bad kitei, ki dei lehse ki nong sahmiet bad lada iakren ia u condom ruh, um dei satia, u tiar uba beain, haba uba lah ban thied da ki lak tylli na ki dukan die dawai.
Na ka liang jong ka seng BJP, ka la ai rong sain pyrthei, halor katei ka jingjia baroh kawei bad ka da kynnoh, ba ka jingim jong U Vice President jongka, ka don ha ka jingma bad kynnoh ruh, ba katei ka dei ka kam shim kabu politiks U Conrad Sangma, myntri rangbah ka jylla, namar ba u syier ia U Bernard, ban iakhun ha ka elekshon MLA 2023.
Na kaba iohi, ha kine ki sngi, katei ka kam, ka la poi sha ka kashari bad la khmih lynti, ba ka kashari, kan sdang bad pynkut ia baroh ki jingkynnoh, lada dei halor ka jing pyniaid kam die met lane halor ka jingthmu ban pyniap ia utei U MDC bad kiei kiei kin sa paw ha ki sngi ki ban sa wan.
Phi don ban ong eiei?