Shah kem u myntri ka West Bengal, ha ka ED, namar ka T.20 klur

New Delhi: U Partha Chatterjee, myntri ka sorkar West Bengal, uba peit ia ka tnat pule puthi, ula shah kem mynta ka sngi, ha ka tnat Enforcement Directorate, hadien ba la ioh kurup ia ka pisa kaba T.20klur, na ka iing sah jong ka paralok jongu, ka Arpita Mukherjee bad katei ka dei halor ka jingbamsap, na ka jingthung kam nonghikai ha katei ka jylla.

Katei ka tnat, kaba tohkit, ka la ioh bor ban tian bishar, ar sngi kynthih ia utei u myntri.

Hynnin ka sngi, la tohkit ia U Partha, baroh shimiet, hadien, ba la ioh kurup ia katei ka pisa. Ha ka por kylli jingkylli, U Chatterjee, um shym la jubab shai satia sha ka ED, ong ka khubor bad katei ka la pynlong ba kin shu kem noh ia u. La iathuh ba ka ED, ka la kem ruh ia ka Arpita, kaba dei ka trai iing, ha kaba la lap ia katei ka pisa kaba T.20klur.