Kawang khajna naphang ka sorkar India

Ka sorkar India, ka la tangon, da ki khajna bapher ha kine ki sngi bad kane ka jingshim khajna, kam dei shuh, ka khajna kyrpad, hynrei, ka dei ka khajna pynbor ia uwei pa uwei u nongshong shnong ka India bad haba ka pla jong ka sorkar India, ka shlei mam, ki heh jong kane ka sorkar, ki kren kob sob, hynrei kim sngewthuh ba kumno ki shu nion da ka bor ia u luk u lak, uba trei shitom ban ioh, la ka bylla ka sngi, ban pyndap ia la ka jong ka kpoh kaba thylli, hynrei, ba u hap siew noh pynban sha ka sorkar India.

Ka dor jong ka khajna GST, kaba dang shu pyntreikam ha kine ki sngi, ka long 5 percent ia ka dud bad ia baroh ki jait jing pynmih dud bad ka dud, ka dei ka kam jong u nongrep, u nongbylla, u duk u raitoi bad ngim lah ban iakren tang ia ka jingsiew khajna, hynrei, kumno ba un pynbiang jingkhein ia ka bai dud, ka bai ai ram dud, ka bai thied phlang bad bun jait ki jingdonkam haduh ban da mih dud bad katei kan buh ia ka jingeh kaba khraw, namar ba katei ka khajna, kan poi shaduh sha ki longiing kiba duk tam, namar ba lada kim don GST ruh, kin shah bam jem ei ha ki nongkhaii.

U khaw, uba dei uwei na ki marbam ba kongsan, ula ngat lang ha ka GST bad hangtei ruh, u nongrep khaw, u dei u riew paidbah bad lyngba katei ka khajna, kan poi shaduh sha tyngkong iing jong u nongrep, uba rit ba ria bad sha uba heh ba hain, ha kaba lada um siew hi dalade, un shah khyrwit ha ki mahajon.

Ngi nang khmih lynti, ba ka Goods and Service Tax (GST), kan kham bha shibun na ka khajna jong ka Value Added Tax (VAT), kaba ki la pyntrei kam hi, da ki jylla, ha ki snem ba ladep; hynrei kitei ki khajna mynshwa, ki long tang 2 percent tam ne duna; katba ha kane te kaba la pyniaid da ka sorkar India, la shu lute im im peit ia u luk u lak.

Kam dei tang kata, ngi nang khmih lynti, ba ka GST, kan treikam ia ki tiar ba ki pyndonkam ki heh spah ne ki nongkhaii ne ki stad ki nang, kum ki kali, ki iing, ki mobile, ka kyiad, ka petrol, diesel bad kiwei de ki mar kiba bun, hynrei lada ki jingjia, kin jia ha kane ka dur, la iohi, kumba lashai, ki painkhana ruh kin hap siew GST, ki nongbylla ruh kin hap siew khajna, ki nong khap shniuh, ki nongdie sha bad kiwei, ha kaba ka khajna, kan tied haduh khlein shyieng artad ia u duk u raitoi.