Nang eh tasam ki kyndon jong ki Bank, ia ki nongbuh pisa

Ka jingtrei kam jong ki Bank, ha kine ki sngi, ka la khlain bor haduh katta katta bad ki kyndon, ba ki pynmih ki la shu khniot im im peit peit ia ki nongthep pisa.

Kham mynshwa ka sorkar India, ka pynbor ia ki paidbah, ba kin ia plie account hapoh Bank. Ynda la dep plie, sa ka shah ot pisa, lada ka duna ka jingbuh pisa, lane kaba long T.1,000 ia kiba plie saving account bad T.10,000 ia kiba plie current account bad hangne, ka wan ka jingkylli, ba kan don jingmut aiu, ban buh pisa hapoh bank, haba tang ban thied khaw ialade ruh, ym don pisa?

Nangta, la buh sa ki kyndon kiba khang ban thep pisa kham bun bad ban sei ruh kumjuh bad la pynbor ban pyndonkam da ka online banking bad katei ka pyni, ba ka jingthmu ka bank, ka dei tang ia ki nong sor, ki kompeni bad ki briew kiba biang ki mobile lane kiba biang ka internet bad kiwei bad kam kut tang katta, ka la mih sa ka kyndon, ba ym bit ban sei pisa man ka sngi napoh Bank lane ban sei pisa na ki mashin ATM ruh bad nangta sa ka jingoh khajna, haba sei ia ka pisa lajong ruh.

Mynta lei, ka mih sa ka kyndon, ba ia ki cheque book, nalor ba la siew sha ki Bank, ia ka bai cheque book, nangta sa ka bai phah da ka dak, mynta, ka la mih sa ka ain, ban siew, sa ka khajna GST, kaba 18 percent ia kawei ka cheque bad lyngba kitei ki kyndon, ka pyni, ba u nongbuh pisa, ula shah khyrwait naduh na shynrong khlieh haduh ha sla kjat, ha ki kyndon ba eh jong ki Bank bad kam dei tang katta, ba ka sorkar India, ka da rhah pisa, ha kaba tang na iwei i kot suda, ka kwah kamai pisa.

Ka sorkar India, ka pynshlur bha ia ki briew jong ka tnat Enforcement Directorate (ED), na ka bynta, ba kin leit khynra ia ki heh spah, ia ki riew sain pyrthei bad kiwei kiwei, halor ka jingbym biang jingkhein jongki, ha ka jingkhaii pateng bad nangta, sa ka jingbuh pisa jongki ha iing, hynrei ki nongkhaii, kim don por bad kim lah ban leit ap, kum u nongkhrong shapoh Bank na bynta ban sei ia ka pisa lajong.
Ka jingpynbor ia ki nongkhaii, ba kin buh ia ki jingkhein kiba biang, ka dei ka jingmut, ka bym larkam satia lano lano ruh bad ka jingkwah ba ki Bank, kin pyniaid ia ka pisa ki nongkhaii, ka dei sa kawei ka kam bieit tasam bad kane kan pynduk ksew ia ki nongkhaii bad kan shna pisa pahuh, tang ia ki Bank, lyngba ki kyndon bapher, ba ki la buh.