Beh ia ki heh spah na Jaintia hills bad thied vote sha Bhoi, ong U bah Sanbor

Shillong:U myntri sorkar jylla, u bah Sanbor Shullai u ba long u dkhot barim ka FKJGP ha ka sngi ba u la leit ban shim bynta na ka bynta kam jingialang pynkup burom ia u bah Wellbirth Rani u President barim ka FKJGP, kaba la long hynnin ka sngi, u la kyntu ia ki nongialam ha ka jylla ba kim dei ban pyndonkam bakla ia ka kyrteng jong ka jait bynriew.

Haba kren ha kane ka sngi u bah Sanbor u la ong “Ha ka por mynshwa haba ngi trei ha ki sengbhalang ngi ju trei naduh myn siem,namar shibun ki jingeh ban trei wat tang ban pyn poi ia ka khubor ban don ka jingiakhih ruh bad mynta ki la kham suk haba ia nujor bad ka por mynta”.

U la bynrap “Ki briew kiba long nongkitkam ha ki sengbhalang hi, ki dei ki briew kiba satar bad kiba wan na ka ing kaba duk”.
“Wat pyndonkam bakla ia ka kyntien jaitbynriew, namar lada ki ong jaitbynriew, wat bad u CRPF ruh ngi ia khyrwit,nga sngew ban ai khublei ia ka seng kaba ngi don bad kumba nga long mynta, dei namar ki seng ba nga don”la ong u bah Shullai.

“Lada ngi don hangno hangno ruh wat pyndonkam bakla ia ka kyntien jaitbynriew kumba la leh da ki heh spah ki ba wan ban thied ia ki vote, kumba la ong wat ju jied ia ki businessman kiba kat ba dang ialap election ki pynpaw ba ki ieid ia ka jaitbynriew, hynrei ynda la jop kin die ia la ka jaitbynriew”u la bynrap.
“Lada ngi bakla ban jied ia ki heh spah ka jaitbynriew jong ngi kan sa shu long kumne shi kumne bad ha kaba khadduh hap ia kynduh bad u CRPF. Ka don ha kti jong phi ban rah ia ka khubor ban beh ia ki heh spah kiba na Jaintia hill bad thied vote sha Bhoi bad jop lut”u la bynrap.

“Ban pynshai ia ki paidbah bad tang ban long jingialang ruh la dei ban shu ieng, ym ha secretariat, hynrei ha la ki shnong; ieng bad beh lut ia kito ki heh spah ki ban wan ban ialap election ha ki shnong, dei ban jied da u trai shnong”la ong u bah Shullai.
U la kynnoh ruh “Kine ki heh spah, ym ba ki don ia ki jaka puta tang ha ka jyllam wat shabar ka Ri ruh ki don la ka jong ka jaka puta bad ha ka por election ki wan ban pynbiej da ki sur ba bang babang, ki wan ai da ka pisa ki ai jingrwai DJ bad lada kiba dang ngop kine ki jingeh ba phi mad mynta kin bteng bad ngi don kam ia ka sorkar ka ba khuid” .

“Wat la nga long u briew na ka sain pyrthei, ruh ngam ju klet ia ka jaitbynriew, lada ym dei ba don u bah Sanbor ka Laban Constituency, kaba dei ka general seat kaba kiwei ki jait byn riew ruh ki lah ban ia leh election, kan ym ioh ia u MLA khasi, nga la lah ban pynrem ia u nongshun jong ka jait bynriew jong ngi, u ba la ujor case pyrshah ia ka District Council”u la ong.

“Lada ym don u bah Sanbor ha Laban yn ym ioh MLA da u khasi bad ngan don ryngkat bad phi, wat kynran dien ban khot sop sop ia nga ruh lada phi don ka jingeh, wat la nga long u briew ka sainpyrthei bad lada donkam ban rah sha jingthiah u Modi ngin ia rah lang”u la bynrap.
U bah Shullai u la ong”Ki mat kiba dei na ka bynta ka jaitbynriew wanrah sha nga, namar nga dei u MLA ba marwei bad ha la i bor i ba rit nga ju leit marwei sha Delhi bad namar ba nga dei u BJP nga ju ioh ruh ban rung da kaba suk”.
Na ka liang u bah Sanbor mynta ka sngi u la ai ruh ia ka jingiarap pisa sha ka FKJGP T1 lak bad u la ong “Kumba phi tip ba ngam dei u MLA u ba tuh bad da ka tulop jong nga, mynshwa ruh nga la iarap shilak bad mynta ruh ngan iarap shilak bad ym dei ka pisa tuh bad nga ai da ka tulop lade “.