Shillong, 17 Nailar:
Kiba ha iing ha sem ka Kong Victoria D Kharkongor ba shah kynnoh phasi ha Dispur Police station, ki la sah ha ka umdum haduh mynta namar ba ka video ka CCTV kaba ki pan na police station Dispur bad ka International hospital, Guwahati ki khlem ioh satia. Haduh mynta, tang ka post mortem ki pulit ka la phah sha kiba haiing ka Kong Kharkongor.
Haba iakren bad kiba haiing hasem jong ka Kong Victoria, ki la iathuh ba kane ka jing bym ai ki pulit ia ka CCTV ia ka jingjia ia ka Kong Victoria haba ka don ha Dispur Police Station bad ha International Hospital, ka la pynlyngngoh ia ki namar ba ki kwah ban iohi ia ka jingshisha kumno ka jia ia ka kong Victoria haba ka don ha katei ka jaka.
“Ngim tip shuh balei ki pulit bad katei ka International hospital kim hym la lah ban ai ia ka video CCTV. Ngi sah ha ka umdum haduh mynta”, la ong iba haiing ka Kong Victoria haba iakren bad u Rupang halor kane ka jingjia.
Kine kiba haiing, ki la pynpaw ia ka jingkhuslai bad sah ha ka jingbym tip namar kim pat tip thikna bad kim ngeit ia ka jingkynnoh ba ka Kong Victoria kan phasi hi ialade.
Kiba haiing ki la suba jur ba ka Kong Victoria ka la shah pyniap , ym ba ka la shu phasi hi ialade kumba la kynnoh bad kam da ki pulit ka Dispur Police station.
Katto katne sngi hadien ba ka Kong Victoria ka la khlad, ki pulit ka Dispur ki la sospen ia 2 ngut ki pulit bad kham hadien, ki la kem ruh ia uwei u briew uba ju iadon iajan bad ka Kong Victoria u Manbha Kumar Hajijam Syiem, uba sah ha Laitumkhrah Shillong.
Katkum ki pulit, ka Kong Victoria ka la pyniap hi ialade ha ka miet 5 tarik Naitung hapoh painkhana ha Dispur Police Station.
Katkum ka khubor, la iathuh ba ka Kong Victoria ka hikai skul ha Arunachal Pradesh, katba u Manbha Kumar Halijam Syiem u la trei kum Warden.
la iathuh ba ka Victoria ka la pynioh kam ia u Syiem ha Arunachal Pradesh bad ki la kynduh lyngba ka Facebook bad hadien ki don ka jingiajuh iajan.
Katkum ka jingong kiba haiing, u Syiem u ju leh tohmet ia ka Kong Victoria ha Arunachal Pradesh. kham hadien ki la leit sha Hyderabad lem bad ka khun jongka, kaba 12 snem hynrei ka khun jong ka Kong Victoria ka la kwah ban wan phai sha Shillong bad ha ka 28 tarik Jylliew, ka kmie jong ka Kong Victoria ka la leit shwa ia ka ksiew na Hyderabad sha Shillong bad ki la wan poi sha Shillong ha ka 1 tarik Naitung.
Dei ha ka 2 tarik Naitung ha ka por 5 baje janmiet ba ka Kong Victoria ka la phun sha iing bad ka la ong ba kan sa wan sha iing, la iathuh ba haiing jongka.
hynrei naduh katei ka por, ba ki khlem tip shuh shaei ka don bad dei tad hadien ba ka la khlad ha Guwahati ba ki sa ioh jingtip kumba iuh tdong bsein.
Phi don ban ong eiei?