Thaw seng ki nongkhaii & trai mawshun ka Sohra-Shella

Saikarap, 17 Nailar:
Ki nongkhaii bad ki trai par mawshun kiba don ha ka thain Sohra bad Shella kynthup naduh Majai, Mawlong, Wah long bad kiwei ki jaka kiba hap hapoh ka Sohra Civil Sub-Division ki la ia kynduh lang mynta ka sngi ha iing dorbar ka Saikarap, Shella ban ia kren halor ka jingeh ba ki nongkhaii bad ki trap par mawshun ki ia kynduh hadien ba la mih katei ka hukum ka high Court ha ka 30 tarik u jylliew, 2015. Ha katei ka jingia lang la donlang ruh ki Rangbah Shnong, ki sordar bad kiwei pat ki nongpyniaid shnong jong katei ka thain.
La lum ia katei ka jingialang da ka Majai Exporter Association. Ha katei ka jingialang kiba bun ngut ki nongkren ki la pynpaw ia ka jingeh jingjynjar ba ki briew katei ka thain ki ia kynduh hadien ba la pyntreikam ia katei ka hukum ka High Court. Ka jingialang ka la rai ruh ban ieng tylli ha kawei ka sur ban kyrpad lyngba ka affidavit sha ka Supreme Court ba kan pynsangeh shipor ia katei ka hukum ka High Court bad ha kajuh ka por ka jingialang ka la rai ban ia treilang ryngkat ryngkat bad ka sorkar jylla lane ka District council na ka bynta ban ia khun ban pyllait ia katei ka jingeh jong ki lyngba ka hukum ka High Court.
Ban pyni ia ka jingiatylli katei ka jingialang kaba la long ha Saikarap ka la thaw da kawei ka seng kaba ka la ai kyrteng ka Sohra Civil Sub-Division Quarry Owners Suppliers and Exporters Association bad ha katei ka jingialang la jied ruh ia ki nongkitkam katei ka seng.
Ka jingialang ka la pynkhamti ia ka kam President ha u bah Jropsing Nongkhlaw , General Secretary u bah Methos Marwein bad u bah B.Lyngdoh kum u Chief Adviser balor kiwei pat ki nongkitkam , katei ka jingialang ka la jied ruh ia ka kynhun ka ban leit ban ia shong pyrkhat ha ka Drafting Committee jong ka KHADC lashai ka sngi ka 18 tarik u nailar ka kynhun ka ban ialam da u bah Jropsing Nongkhlaw.
Haba kren ia ka jingeh ba ki paidbah nongshong shnong katei ka thain ki ia kynduh namar ka jingkhang mawshun haba ia kren bad ki nongthohkhubor u bah Jropsing Nongkhlaw, u la ong ba ka jingshah khang tih mawshun ha ka ïingbishar ka la ktah ym tang ia ki nongkhaii ne trai par mawshun hynrei ka la ktah salonsar naduh ki nongtrei bylla sngi, ki nongshong dukan bad kiwei pat kiba shong ba sah ha ka thain Majai kiba ju shaniah tylli ban bsa ia la ka iing ka sem lyngba ka kam na u mawshun.
“Kum ka Association kaba dang thaw thymmai, ngi buh ha ka jingkyrpad hakhmat ka sorkar ba kan shimkhia lem halor kane ka bynta namar ka la ktah ym tang ia ki spah hynrei ia ki hajar ngut ki paidbah. U la ong ka association hi kan ai ka jingiatrei lang kaba pura ia ka sorkar jylla bad wat ia ka district council na ka bynta kane ka kam” la ong u Bah Nongkhlaw. Ha katei ka jingialang, kiwei ki nongkren ruh ki la pynpaw ia ka jinghiar ka ioh ka kot ha katei ka thain tang mar ia khang ia u mawshun.
Lah ban kdew ba katei ka jingialang ha ka jingshisha la pynbeit ba kan long ha ing skul ha Ichamati, hynrei namar ka jingkhapngiah palat ka kamra la pynkynriah noh sha ing dorbar ka Saikarap.