Nongpoh:Mynhynnin ka step ha ka por 6 baje eiei mynstep, ki Pulit ka Byrnihat Police Outpost, ki la ioh kurup haduh 90 byrni u kwai supari, na ki ar-tylli ki bos Night Super, kiba thmu ban hiar sha Guwahati.
Kitei ki ar-tylli ki bos Night Super, ki dei kiba don ia u number AS-01-DC-7860 bad AS-01-HC-9034 kiba la long trai da u Hiren Ali bad katkum ka jingiathuh u nongniah jong kawei na ki ne ki bos, la ong ba ia kitei ki kwah supari la wanrah hi da u trai jong kitei ki bos.
La ong ba kawei na kitei ki bos kaba mih na Jiribam sha Guwahati bad kawei pat ka dei kaba mih na Dharmanagar sha Guwahati, ha kaba la ong ruh ba u trai jong kitei ki bos, u la thep 40 byrni tam ha kawei kawei ka bos.
Hadien katei ka jingioh kem ia kitei ki kwah supari ba thmu shalan tuh sha Guwahati ki la aiti noh sha ka tnad Custom ban leh ia ka ba donkam baroh, la ong ruh ba utei u Hiren Ali, u dei uba la shah kem bunsien ha ki Pulit Ri Bhoi halor ka jingdonkti jong u ban shalan beain ia ki kwah supari.
Phi don ban ong eiei?