Kam u myntri, ba ka jingsiew ia ki nonghikai, ka dei kaba biang tam

Shillong:U Myntri u ba dei peit ia ka tnad pule puthi ha ka jylla u bah Lahkmen Rymbui, u la ong ka rai jong ka kynhun myntri ha kaba ia dei bad ka jingpynkiew ia ka jingiarap pisa ia ki nonghikai adhoc ka dei ka ba biang tam.

“Ka rai kaba ngi la shim hynnin ka sngi, ka dei ka kaba la biang tam namar ba ha shwa ba ngin shim rai ngi la bishar bha na baroh ki liang bad ngi shim rai kat kum ka jingdon ka pisa ha ka sorkar jylla”la ong u bah Rymbui.
Haba kylli halor ka jingdawa jong ki nonghikai adhoc ia ka 5% ka jingpynkiew tulop man u snem u la ong “Ka jingdawa 5% jong ki na ka liang ka sorkar kan dang bi shar bad kan sa peit la ki lah ne em ban pynurlong”.

Ka jingbun ki kyrdan jong ki nong hikai, u la ong “Ka long ka ba suk ban kren namar ba man ka sngi ki skul ki ju wan mih man ka por ban ia kren halor ka jingkyrpad ban iarap na ka liang ka sorkar bad kaei ba ka kynhun myntri ka la dep rai ka dei ka ba biang tam”.

Lah ban kdew hangne, ba na ka liang ki nonghikai adhoc ki ba don hapoh ka FASTOM ki la sangeh noh ia ka jingiakhih jong ki hadien ba ka sorkar ka la pdiang ia ka jingdawa jong ki, hynrei na ka liang ki nonghikai ki la pynpaw ruh ia ka jingbynniaw namar ba ki la dawa T.18000 ka jingpynkiew tulop na ka bynta baroh ki nonghikai, katba ka sorkar ka ai tang T9000 na ka bynta ki nonghikai secondary bad T.6000 na ka bynta ki nonghikai Primary.