Ngim kmen ko Conrad Sangma, Prestone Tynsong, Lahkmen Rymbui, ong ka FASTOM

Shillong:Ki Nonghikai adhoc kiba don hapoh ka Federation of All School Teacher Of Meghalaya (FAS TOM), ki ba dang don hap deng ka jingiakhih mynta la 7 sngi, da ka ba shong bad sngi bad miet ha parking lot jong ka Additional secretariat, ki la pynpaw ia ka jingdiaw, ka jingbym hun bad ka jingdom, halor ka jing pynbynta ia ka jing iarap pisa ia ki nong hikai adhoc, kat kum ka category jong ki nonghikai.

Lah ban kdew hangne, ba na ka liang ki kynhun myntri jong ka sorkar MDA mynta ka sngi ka la shim ia ka rai ban pynkiew ia ka jingiarap pisa sha ki nonghikai adhoc da T9000 bad T.6000 ha ki category kiba kynthup ka Higher Secondary, ka Secondary, ka Upper Primary bad ka Lower Primary.

Ka jingpynpaw ia ka jingdiaw ka jingbym hun bad ka jingdom ia ka rai jong ka kynhun myntri, ka long namar ba na ka liang ki nonghikai adhoc kiba don ha ka lama jong ka FASTOM, ki dawa na ka sorkar ban kyntiew ia ka tulop ia baroh ki nonghikai da T18,000.
Ha ba ia kren ha kane ka sngi, na ka liang u nongaiktien ka FASTOM u bah Mayborn Lyngdoh u la ong “Ka rai kaba mih na ka jingialang jong ki kynhun myntri mynta ka sngi ym don uwei ruh u nonghikai hangne un kmen ia kane ka rai bad ngi sngew ba ka sorkar ka la pynpoh ia ngi”.

“Ka jingleh jong ka sorkar ban shim ia ka rai khlem da shim ia ka jingdawa jong ngi, namar ba man ka por ngi la dep kynduh ia ki ophisar, ki minister ngi la dep ia kylli ia kane ka jingpynkhreh jong ki, na baroh, hynrei ym don nongkren shai bad mynta ka sngi ngi la ioh ia ka rai, ngi sngewduh jingkyrmen”u la bynrap.
“Ngin pdiang ia kane lane ngin kyntait ia kane ka rai, ngim pat nang ban rai mynta bad ngim hun bad kmen, namar ba ha ka jingdawa jong ngi, ka long ban pynkiew ia ka jingiarap na ka bynta ki 4 category ka ban long T18000 na bynta baroh”la ong u bah Lyngdoh.

“Ka jingdawa jong ngi ban kyntiew lang katjuh ka long, namar ba dei tang ngi hi kiba tip ia ka jingeh ba kum ki nonghikai ki mad bad ngi kwah ia ka jingpynkiew ka ba long kat juh ia baroh”u la bynrap.
U la ong “Nga dom ban iohi ia ka sorkar ba kan leh kumba ka tip lut ba katno ngin dei ban ioh bad ngi la ong kajuh shi kajuh, ba ka jingpynkiew ia ka tulop ka dei ban long kumjuh ia baroh hynrei ka ei ka ba ki leh ka long tang ban phiah ia ki nonghikai ban ioh shynshar”.

“Ngim kmen ko Conrad K Sangma, ko bah Prestone Tynsong bad ko bah Lahkmen Rymbui halor kane ka rai,namar ba ka FASTOM kam dei halor u wei u briew lane sanngut hynrei ka dei na ka bynta baroh bad na ka liang jong ngi, ngi dawa ba ka dei ban pynkiew katjuh ia baroh”u la bynrap.
U bah Mayborn u la ong “Ka sorkar ka dei ban bishar bniah biang ia kane ka rai bad na ka liang ki nonghikai adhoc kin sa shim ia ka rai la shai ka sngi, la kin dang bteng lane kin sangeh noh ia kane ka jingiakhih jong ki”.