Ialeh iarieh ka District Council bad ki nongdie madan ha Iewduh

Shillong, 14 Nailar:
Ka jingiakhun hap deng ka KHADC bad ki nongdie madan ka la long pynban kum ka jingia lehkai ia rieh, naba ki nongdie madan kim shym la khein snep eiei ia ka tnad khaii pateng ka KHADC ha kaba tang mar ia lait ka khmat ki pulit Enforcement ki la sei biang la ki mar ki mata ban phriang ha madan.
Haak sngi thohdieng jong ka taiew ki pulit Enforcement ka Khasi Hills District Autonomous District Council (KHADC) ki la leit ban khynra ia ki nongdie madan kiba shong die be-ain ha shi lynter ki rud surok bad ki lynti iaid kjat ka Iewduh naduh na Iew Mawlong ter ter. La iathuh ba ka KHADC ka la sdang ia ka jingleit khynra nongdie madan naduh ka por 10:30 baje mynstep haduh ka por 12 baje eiei.
La iohi ba ha ka por 12:30 baje eiei mynsngi ha katei ka sngi thohdieng baroh ki rud surok bad ki lynti iaid kjat ha Iew mawlong ki la khuid plain bad ki la kylluid war, hynrei tang hadien ar kynta eiei kata haba ki nongthohkhubor ki iaid lynti na katei ka jaka ki la lap ba ki lynti iaid kjat ki rud surok ki la dap biang smam da ki khar die shana, ki nongdie jain bad kiwei pat kiba die jingdie be-ain.
Hadien ba la lap ba ki rud surok bad ki lynti iaid kjat ki la dap biang, ki nongthohkhubor kiba la iaid swait sha katei ka jaka ki la ioh ban ia kren bad ki riew paidbah kiba don ha kitei ki jaka shaphang ka jingwan khynra ki pulit ka KHADC, hynrei ka jubab ba la ioh na ki paidbah ka dei ba ki la ong ba ka dei tang ka jingialehkai ia rieh hapdeng ka KHADC bad ki nongshong die madan.