HYDERABAD: U Amit Shah, nongialam ba rangbah jong ka seng BJP bad uba dei ruh u myntri kam poh iing ka sorkar India, ula kren shai mynta ka sngi, ha ka jingialang jong katei ka seng ha Hyderabad, ba ka bor treikam jong ka seng BJP, kan synshar ia ka India, ha ki 30 haduh 40 snem, ki ban sa wan bad ula ong ruh ba ka India, kan sa kylla long ka bor kaba khlain tam ha ka pyrthei.
Haba leit rah ia ka mat jong ka jing iatai, ha ka jingialang jong ka BJP, U Shah, ula ong ba ka synshar jong kawei ka iing, ka synshar iapher jaitbynriew bad ka sain pyrthei kaba shu thom da ka bor, ki dei ki pop kiba khraw tam bad ka dei na kane ka daw, ba ka Ri, ka mad ia ki jingeh ba bun ha ki phew snem ba ladep.
Haba kren sha ki kotkhubor, U Himanta Biswa Sarma, myntri rangbah ka Assam, u iathuh ba U Shah, u pynsngew ba ka jingiai jop jong ka seng BJP, ha ki elekshon, na ka por sha ka por, ka pyni, ba katei ka seng, ka trei ia ki kam pynroi bad ia ki kam kiba bha bad kiba pynduh ia ka sain pyrthei da ki riew shimet, ka jingsngew iapher jait bad ka jingleh donbor. La ong shuh shuh ba ka seng BJP, ka la rai ban pynduh noh shisyndon ia ka jingsynshar jong kajuh ka longiing ha Telangana, West Bengal bad kumjuh ha Andhra Pradesh, Tamil Nadu bad Odisha, kiba dei ki jylla, kiba ka BJP, kam pat ioh satia ban synshar.
La ong shuh shuh da U Sarma, ba ka jingkiew jong ka BJP, la khmih lynti, ba kan wan na shathie jong ka India.
Pynduh jait sa ha meghalaya na ka jing synshar ki sangma