Rakhe ka jylla ia ka sngi laitluid, da ka jingshong kun

Shillong, 16 Nailar:
Ka jylla Meghalaya  ryngkat ka ri baroh kawei, ka la rakhe ia ka sngi laitluid jong ka ri kaba 69 snem ha kane ka sngi Saitjain ka 15 tarik Nailar, 2015 ha madan Polo, Shillong.
Ka jingrakhe ka long kaba iphuh iphieng ha kaba ka helicopter  ka Eastern Air Command ka la pynher syntiew ha ka por ba pynkiew ia ka lama ka ri ha katei ka jaka.
Ha kane ka jingrakhe ki don haduh  22 tylli ki kynhun ba la iashim bynta ha ka jingiaid ban ai khublei ia ka lama ka ri kynthup ki skul na kylleng ka nongbah, ki shipai na ka 58 GTC, BSF, CRPF, ITBP, ki pulit ka Meghalaya, DEF, Home Guards, NCC, Bharat Scouts & Guides. Ia kane ka jingiaid ban khublei ia ka sngi laitluid ka ri la ialam da u Parade Commander Major T. Shengboi Singh na ka 58 GTC.
Ha kane ka sngi la sam   ruh ia ki khusnam President’s Medal sha ki riew shlur.  Kiba ioh ia kane ka khusnam ki long u Deputy Superintendent of Police, Meghalaya, u T.C. Chacko, katba ia ka President’s Police Medal for Gallantryki long u Goera T. Sangma, Probinstar Kharbani, Dressing K Shabong, Pyrkhat Minot Nongsiej, Sanjay Kumar Ray, Sushil Mahato, Tushar F N Marak bad kiba ioh ia ka Police Medal ki long u Havildar Novelson Lyngdoh ka 1st MLP Bn, katba ka Margrecia Thangkhiew ka Compounder (CTI) bad u Ricoverstar Lyngdoh ki ioh ia ka Home Guards & Civil Defence Medal.
Ha kane ka sngi la pynshong shit bad pynphuh pynphieng da ka jingialehkai kynjatbol hapdeng ki kynthei ka Royal Wahingdoh FC pyrshah ia ka San Bhalang FC; ka jingdro dur, ka jingpyni riam, ka jingiatem iaput, ka jingpyni sinema.
Ka jingrakhe la pynlong ruh ha kylleng ki district, sub-divisional bad ki blok ruh.