Pyneh ki nonghikai, ba mut kyndang ki majistor sha Additional Secreteriat

Shillong:Hapdeng ka jingpahara jong ki pulit ryngkat ki lathi ïa ka Secretariat bad ki sawdong sawkun jong ka, na ka daw ka jingïakhih jong ki nonghikai kiba hapoh ka shatri ka Federation Of All School Teachers of Meghalaya (FASTOM), mynhynnin ka sngi, da ka jingïatylli lang ki la kyntait ban kynriah na ka jaka shong kyllaiñ myngngor ha surok pyrshah Secretariat bad ban pynkheiñ ïa ka hukum ba ka DC ka la pynjari ïa ka kyndon 144 CrPC bad ka la pynmih hukum ba kin kynriah noh, namar ki khlem ïoh jingbit satia ban pynlong ïa kane ka prokram ïakhih.

Ha kaba ïadei bad kane ka liang u nongaiktien ka FASTOM u Babu Mayborn Lyngdoh, u la tyrwa ïa ki para nonghikai baroh ba kin kynriah noh na katei ka jaka sha Additional Secretariat katkum ka hukum ba la mih na ka liang jong ka DC, hynrei baroh da kawei ka sur ki la rai lang ban nym khih satia na katei ka jaka shong, bad ki la mynjur lang sa shisien pat ba kin bteng biang ïa ka jingthiah miet ha kane ka jaka.

Ka ophis jong ka Deputy Commissioner, ka la pynmih ïa ka hukum ba nym shah shuh ïa ki nonghikai ban shong bad thiah miet ha katei ka surok ïaid briew (footpath) bad ka la ai hukum ba ki dei ban pynkynriah noh sha ka jaka ïeng kali jong ka Additional secretariat, hynrei baroh shisngi hapdeng ka jingïakren u nongïalam ka FASTOM bad u magistrate uba la pyrshang ban pynkohnguh ïa ki, kam shym mih satia ka jingseisoh bad da kawei ka sur ki nonghikai ki la pyrta jam, “Em te em, ngi nym khih.”

Lah ban kdew ba da ki hajar ngut ki nonghikai Adhoc kiba hapoh ka lama jong ka FASTOM ki la pynlong ïa ka jingïakhih khlem sahngeh bad khlem thait da kaba ki la thiah miet ruh ha katei ka surok mynta lah lai sngi lai miet.
Katkum ka tyllong khubor la ong ba u myntri rangbah ka jylla u Conrad K Sangma uba bat ruh ïa ka tnat pla tyngka (finance) un sa khot kyrkieh ïa ka jingïalang bad ki nonghikai ban pynsngew ïa ka rai kaba khatduh. Ka surok ha pyrshah ka ïing secretariat ka la kylla long ka jaka thiah miet ïa ki nonghikai bad kaba pynpang met wat ïa u nongleit nongwan, hynrei lah ban kdew ba haduh mynta kam pat don satia kano kano ka jingkhot jingïalang na ka liang jong u myntri rangbah bad ka paw kdar ba u myntri rangbah um pat lah ban shim ïa kano kano ka rai.

Kumjuh ruh kum ban pynkynmaw hangne ba hynnin ka sngi na ka liang ka sorkar lyngba u Myntri ka tnad pule puthi ki la khot jingïalang bad ka kynhun ki nonghikai ban pynsngew ïa kaei kaba ki la leh ha kaba ïadei bad ki mat jingdawa jong ki hynrei na ka liang ki nonghikai kim shem la pyndem satia katba ka sorkar kam pat lah ban pynmih da ka hukum ba kan pyntreikam noh ïa ka mat kaba ki dawa.