Da ka jingïarap u Bah Prestone bad ki paralok, lait im u nong Kolkata, ha u snem 1979

Shillong:Mynhynnin, ka sngi ka H Gordon Robert Hospital Shillong, ka la plie paidbah ïa ka phalor ba la pynwan dur thymmai da ka jingnoh synnïang jong u Nongaibuit ka Sor kar u Dr DD Lapang.

Ïa kane ka khyrdop ba la pynwan dur thymmai la plie da u Bah Prestone Tynsong uba long ruh u Kongsan ryngkat u Dr DD Lapang kum u Symbud Kongsan ha ryngkat ka jingdon lang ka kurim jong u ka Kong Amethyst Lynda Blah bad la pyn kyntang da ka jing duwai ïa u maw kyrteng ba la thoh sah kyn maw da u Rev SS Majaw uba dei u Chairman jong ka Governing Board jong kane ka jaka ai jingsumar.

Haba kren ha kane ka sngi u Bah Prestone, u la ñiewtang ïa ki synnïang kiba kane ka jaka ai jingsumar ka la leh na bynta ka imlang sahlang ha kine ki 100 snem naduh ba la seng ïa ka khamtam eh ha u snem 2020-21 mynba ka jylla ka ïakhun ïa ka thma pyrshah ïa ka jingpang Covid-19. Shuh shuh u Bah Prestone u la ïathuh ruh ïa ka khana kaba u la ïa kynduh ïa ka jinglong ba la kloi jong kane ka hospital ban ïarap ïa kiba donkam ha kaba ha u snem 1979 mynba ka dang thnem ka jingïakhih beh bar jylla ha kaba ma u bad ki paralok ki la lap ïa uwei u briew uba la thiah lyngktar ha ka snam da ka jingïarap jong u bad ki paralok jong u la rah sha kane ka jaka sumar bad hadien la tip ba dei uba na Kolkata, ïathuh u Bah Prestone.

Na ka liang u Bah Prestonen u la ai ruh ka jingkular ba na ka liang ka sorkar jylla kan pynsahnam ïa ki kam radbah jong u Dr H Gordon Robert ha kaba ïa ka surok kaba na Mawkhar sha Robert Hospital yn ai nam ha une u nongmaitshrah jong kane ka jaka ai jingsumar. Shuh shuh u Bah Prestone u la ïathuh ruh ba na ka liang ka sorkar ka don ka jingthmu ban pynsahnam ïa u synïang jong kiwei pat ki mishonery ha kaba la rai ba ïa ka surok na Umtyngngar sha Sohra yn jer kyrteng noh kum ka Thomas Jones uba dei u kpa jong ki dak thoh Khasi.
Shuh shuh u Bah Prestone u la ïathuh ba dei namar ki kam radbah jong ki jaka ai jingsumar shimet ba ka sorkar ka la ai kawei kawei ka oxygen plant.

Haba kren kum u Symbud Kongsan bad u nongsyniang ban tei thymmai ïa ka phalor jong kane ka hospitaln u Dr DD Lapang, u la ïathuh dei shi bynta ban kynmaw ïa ki kam ba bha kiba kane ka hospital ka la leh sha ka jaidbynriew bad khamtam eh sha ka ïing jong u mynba ka kurim jong u ka shah sumar ha ka por ba ka kha ïa ka khun phrang sngi jong ki.
Ha kane ka sngi la sakhi ruh ïa ka jingrwai ba la ai da ki doktor jong kane ka jaka ai jingsumar bad kiwei de ki jingkren na ki dkhot ka Governing Board jong kane ka jaka ai jingsumar.