Ia kynduh DC ki 2 seng na u Aadhar

Shillong, 13 Nailar:
Ki Ar tylli ki Seng bhalang na West Khasi Hills kaba kynthup ia ka KSU Nongstoin Circle bad ka HYC ki la leit ban ia kynduh ia u Deputy Commissioner ka WKH ban pan jingshai halor u Aadhar Nombar. Katei ka jingleit ia kynduh DC ki ar seng ka dei namar ba la don ki paidbah kiba la kynnoh ba u dei u nombar 666 kaba la pyntieng ruh ia ki.
Ki ar seng ki la kyntu ia u DC, ba un leit pynshai sha ki paidbah ha kaba iadei bad utei u aadhar nombor bad shuwa ban sdang pyntreikam ia u khnang ba lada ki paidbah ki pdiang ruh kin pdiang da kaba hun mynsiem khlem kano kano ka jingartatien.
Katba u bah S.Kharlyngdoh, DC WKH u la ong ba ka jingthmu ka sorkar ban pyntreikam ia u Aadhar nombar ka dei ka jingthmu ban lum ia ki rikod ia ka rukom im ki briew lyngba bio metric rikod kaba don ha ki shyngpriah kti bad halor ki shyllangkhmat jong manla uwei pa uwei u briew bad kaba iapher na manla uwei pa uwei u briew wat la ki iadei shi iing shishem ruh.
Shuh shuh u la ong ruh ba lyngba ka jingdon katei ka biometric data record lah ban teh lakam ia ka jingdon bun kyrteng ki briew ha ka electoral roll lane ki briew kiba don kyrteng lai saw tylli u juh u briew, u la bynrap ruh ba kum kita ki briew ki don ka jing thmu aiu re sha lyndet bad da ka jingdon katei ka biometric lah ban pynshisha noh kum ia kita ki briew kiba don kyrteng palat ka shi jaka.