T.26hajar klur, pan pisa ka PWD ban maramot ia ki surok ka jylla

Shillong:Hadien ba don ka jingjulor ki surok bad ki lynti syngkien ha kylleng ki bynta jong ka jylla, na ka liang ka tnat PWD lah dep ban ïa shong pyrkhat bad ban kheiñ ban diah ïa ka bai lut bai sep bad ban phah ruh ka jingpan pisa na ka sorkar pdeng kumba 25,551.61 klur eiei ban maramot ïa ki surok kiba la shah ktah jur ha Khasi Hills, Jaiñtia Hills bad Garo Hills.

Haduh 38 tylli ki surok ha kylleng ki bynta jylla, ki la julor namar ka jingther u slap ha kine ki taïew bad ki sngi ba lah dep bad kaba la pynlong ïa ka jingtwa khyndew, shlei um bad wat haduh ba la duh ruh ïa ki mynsiem briew.
Katkum ka tyllong khubor, na bynta ka Khasi Hills, la pan 2,012.68 tyngka na ka bynta ka ban maramot ba shipor (temporary), bad 6,157.57 tyngka na ka bynta ka jingmaramot ba pura (permanent).
Ha Jaiñtia Hills ka PWD ka la mang 1,373.05 tyngka na ka bynta ka jingmaramot ba shipor bad 1,963.35 tyngka na bynta ka jingmaramot ba pura.

Ha Garo Hills, 3,712.88 tyngka bad 10,332.08 tyngka na ka bynta ka jingtrei kaba pura, baroh kynthup ka kot 7,098.61 tyngka (temporary) bad 18,453.00 tyngka (permanent).
Namar ka jingther u lapbah ha kine ki sngi ba lah dep, ka jylla Meghalaya ka la mat ïa ka jingduhnong kaba khraw, ki don ruh bun tylli ki jingkieng bad ki jingtei kiba la pra bad kyrang pait, bad namar ka jingtwa khyndew ka la pynjulor ïa 38 tylli ki surok kiba donkam ïa ka jingmaramot ban pynïasoh biang hapoh ka jylla ba kynthup ïa ki surok bah NH, ki surok ba pynïasoh ïa kawei ka district sha kawei pat bad kumjuh ruh ki surok shnong.

Naduh ka 1 tarik u Ïaïong,2022 baroh ki don 34 ngut kiba la duh noh ïa ka jingim. Hapdeng ka jinglong jingman la sakhi ba ka sorkar, ka tnat pulit, tnat shipai liengsuiñ bad ki seng ba shong ha ka liang pyrshah ki la kner ïa ka kti jingïarap sha ki lanot na ka jinglynshop u slap.