Ym U Pala, ka Congress, ka troin naduh na Delhi, ong U bah Lapang

Shillong:U nongaibuit rangbah jong ka National Peoples Party(NPP) u Dr DD Lapang, u la ong,ka jingwan jong u bah Vincent H Pala kam dei ka daw jong ka jingtroin ka party Congress ha ka jylla.

Lah ban kdew hangne ba u bah DD Lapang, u ba long u Myntri rangbah barim ka jylla, u la iehnoh ia ka party Congress ha ka 15 tarik u Nailur 2018 bad pyniasoh noh ia lade sha ka party NPP, kum u nongaibuit kane ka seng sainpyrthei.
“Ka jingtroin ka party Congress ha ka jylla, ngim lah ban kynnoh ia u bah Pala, namar ka jingsdang jong ka jingtroin ka Congress ka la dei naduh na Delhi hi” la ong u bah Lapang ia ki lad pathai khubor ha ka sngi ba ar.

“Ka Congress ka troin na ka daw ka jingtlot ki nongialam jong ka naduh na Delhi bad wat la kim treh ban kam ia kata hynrei ki briew ki kren shibun bad ka jingduh ka jingshaniah na ki paidbah ka la pynduh ia ki na ka bor”u la bynrap.
U bah Lapang u la kdew ruh “U bah Pala u dei u briew u ba stad bad u ba lah ban ialam ia ka Congress bad biang nadong shadong ban ialam ia ka party bad nga iohi ruh ba u la trei shitom halor kane ka bynta bad ngam kwah ban kren eiei halor ka jingialam jong u”.

“Ha kane ka election, un iakhun ia ka election 2023, ngin peit la ki paidbah kin jied ia u ban long u nongmihkhmat ha ka jylla lane ki briew ka parliamentary kin phah biang ia u kum u MP, hynrei u bah Pala kum u nongialam u long u ba biang nadong shadong”u la ong.