53 tylli ki bos sawkhmut, kiba la sniew, la dep lilam noh

Shillong:Hadien ba ka sorkar ka don ka jing thmu ban wanrah da ki bos kiba thymmai na bynta ki skul bad ki nongleit nongwan ban pynduna ïa ka jing dheng kali ha nongbah Shillong ,na ka liang u Rupang u pyrshang ban wad jingtip ïa ki bos kiba la don lupa kiba la wanrah da ka sorkar ha ki snem kiba la dep lyngba ka projek Jawaharlal Nehru National Urban Renewal Mission (JNNURM) ne ki bos saw kumba ïa tip paidbah.

Katkum ka jingtip ba u Rupang u ïoh na ka ophis jong ka Meghalaya Urban Development Authorit la lap ba ha u snem 2009 ka sorkar ka thied 120 tylli ki bos bad ha u snem 2014 pat la thied 139 tylli bad lada kheiñ ka sorkar ha ki snem kiba la dep ka thied 259 tylli ki bos.

Katba na ki 259 kiba ka sorkar ka thied kiba la sniew pat ki don kumba 53 tylli bad ïa kine kiba la sniew ka sorkar ka la lilam noh ha u bnai Kyllalyngkot mynta u snem hadien ba la ïoh ïa ka jingkheiñ ïa ka dor ka ban die, na ka ophis u DTO, Shillong.
Kumba long mynta ki bos kiba dang sah ki long 206 tylli bad 202 tylli la dep ban ai pynïaid (tender) sha 9 tylli ki kynhun pynïaid kali ne operator ha kylleng ka jylla. Shuh shuh la lap ba ki don kumba 4 tylli ki bym don satia mano mano ban wan thep tender ban ïoh pynïaid ïa kine ki bos.

Shuh shuh la lap ruh ba ïa ki bus kiba shu buh ha surok bad kiba ym pyndonkam shuh ki la ai ei noh sha ki jaka pule ba kin ioh pyndonkam ei. Haduh mynta ka sorkar ka la ai 6 tylli sha ki jaka pule, 1 sha Williamnagar Govt College, 1 sha Captain Williamson Memorial Baghmara Govt. college, 1 sha Sohra Govt. college, Sohra, bad 3 tylli sha ka Khadsawphra College, Mairang.