Khlad ka kmie bad saw ngut ki khun ha Dangar; 11ngut kiba iap, na ka jinglynshop ka mariang ha ka jylla

Shillong:Ka jinglynshop u slap u ba jur u ba la wan rah ia ka jingduh kaba khraw ia ka jylla, ym tang ha ki jingdon jingem, ki jingthung jingtep; hynrei kaba kham kordit ka long ka jingduh noh ia ka mynsiem ba kordor jong kiba bun.

Mynhynnin ka sngi ruh ka jingwan lynshop u slap ka la shim ia ka jingim jong ki 11 ngut ki briew ha baroh kawei ka jylla bad kitei ki kynthup ia 7 ngut tang East Khasi Hills District bad 4 ngut ha South Garo Hills District.

Ha East Khasi Hills District ki 7 ngut ki briew ki ba la khlad ki dei na Mawsynram Constituency, kiba kynthup ia ka 5 ngut na kawei ka long ing na Dangar,1 na Kenmynsaw ,1 na Boro Ryngku bad 1 na Betgora.
Ki san ngut kiba la khlad ha Dangar, na ka jingtwa khyndew, ki kynthup ia ka kong Kyllity Langpen 32 snem ka rta (kmie), Daphishisha Langpen 12 snem ka rta (khun kynthei), Daskhemlang Langpen 5 snem ka rta (shynrang), Sa-i-dawanbiang 3 snem ka rta (khun kynthei) bad uwei u khyllung shynrang, uba dang 6 bnai ka rta. Ha kane ka jingjia u kpa ka ing u bah Sanborlang Marak u la laitim.

Ha Kenmynsaw kawei ka long ing ka la ngat ha ka jingtap ka khyndew bad ha kane ka jingjia ka kong Drit Byrsaw, ka la khlad noh kat ba ia u kurim jong ka, u bah Robino Kynter um pat shem bad ka jingwad ia u ka dang iaid shakhmat kat ba ia ki khun la ioh ban pynlait im.
Ha Boro Ryngku ka heprit Sonali Banai 7 snem ka rta, ka la duh ei ia la ka jingim bad ha Betgora (A) u A Nathan Dejel Sangma 12 snem ka rta u khlad noh hadien ba don ka jingtwa ka khyndew bad ban ia ka ing jong ki.

Haba iathuh halor ki briew ki ba la khlad mynta ka sngi ha South Garo Hills District 4 ngut ki briew, ki la duh ei ia la ka jingim na kine 3 ngut ki dei na ka juh ka iing kaba kynthup ia u kpa ka kmie bad u khun ha Baghmara Bolsogre bad u wei ha Siju SGH.
Sa ar tylli ki iing, ki la khyllem bad kitei ki dei ki iing jong ka kong R Khongsit na Sohra, kaba hap ha Shella Bholaganj Block bad ka iing jng ka Kong Shidalin Suting na Mawjam, kaba ha Mawkynrew Block.
Ki surok kiba la julor ki long ka Mawlieh, Shillong sha Dawki, kaba la twa ha Pynursla; tangba mynta ka long hi ban iaid kali, nangta ka surok Shillong Nongstoin, hajan Umsohiong, kaba jia ha Sohiong bad ka surok kaba la twa, tangba lah ban pyniaid kali, nangta ka surok Sohiong Shilliang Dongki, ha Sohiong, tangba ki kali ki lah ban iaid, nangta ka surok Sohra Nongrim, kaba la sniew ha Shella bad ka surok ka la twa, tangba ki kali ki lah ban iaid, nangta ka surok Mawshamok, kaba sniew ha Shella, ha kaba ka surok, ka la sniew, tangba ki kali ki lah ban iaid, nangta ka surok Tyrna, ka surok Mawlong, surok Pynursla Myllat, surok Ryngku Hatmawdon, kaba sniew ha Mawsynram.